88. Aliud Alphabetum.

1. Ave, rosa vernans flore,
Virgo praegnans coeli rore,
Bysso candens plus nitore,
Mater facta miro more.

2. Conditorem per suave,
O Maria, gignens Ave,
Dextram tende, votis fave,
Culpae tollens onus grave.

3. En ab uno vix respiro,
Bino fixus morsu diro,
Forma vitae, quam suspiro,
Me intende, te requiro.

4. Gemens precor sub peccatis
Nudus veste caritatis,
Horrens formam foeditatis
Fontem peto puritatis.

5. In te cunctis, o Maria,
Exoranda mente pia,
Raritatis patet via,
Lex virtutum et sophia.

6. Laxa nodos peccatorum,
Christi causa miserorum
Mater facta, quo reorum
Sis asylum, laus bonorum.

7. Nunc justorum adsis laudi,
Peccatorum fletus audi,
Opem ferens nos exaudi,
Ne mens ulli cedet fraudi.

8. Pelle moesta, confer laeta,
Mundi regna sint quieta,
Quo letali cura spreta
Sit vitalis vitae meta.

9. Reple sancto nos timore,
Fide recta, spe, amore,
Sis tutela mortis horae
Acherontis a terrore.

10. Tuum nomen mihi foedo
Perpes mentis sit dulcedo,
Vitiorum nam, ut credo,
Omnis cedet sic nigredo.

11. Xristi luce me beari

Da, quam lingua nequit fari,
Ymmo jungens laude pari
Fac electis conlaetari.

12. Zelo pestis crucietur,

Homo per te quod salvetur,
Et ut Deus hinc laudetur,
Perpes nobis regnum detur.