89. Meditatio de BMV.

1. Ave, sacrum vitae flumen,
Paradisi purum lumen,

Nos clementer respice,
Intra domum ubertatis
Nos torrente voluptatis

Abundanter refice.

2. Ave, clara stella maris,
Disciplina salutaris,

Nos emunda vitio,
Te permittas nunc apprendi
Per exemplum te sequendi,

Ne nos tangat ultio.

3. Ave, domus castitatis,
Templum purum sanctitatis,

Dei plena gratia,
Nostram offer Deo precem,
Cordis nostri munda faecem

Delictorum venia.

4. Ave, virgo mons electus,
In quo Deus carne tectus

Elegit quiescere,
Qui nec dolum unquam egit,
Nec pudoris claustra fregit,

Cum te fecit parere.

5. Ave, virgo quam invenit
Puram Deus et praevenit

Benedictionibus,
Cujus caput pater unxit
Et ornavit et distinxit

Virtutum lapidibus,

6. Ave, virgo, fructu cujus
Et sapore fructus hujus

Recreatur populus,
Facta virga florem dando,
Mortem hostis effugando

Facta tamquam baculus.

7. Ave, virgo, fons signatus,
Quam signavit Christus natus

Vultus sui lumine,
Dum in ortu salvatoris
Stat illaesus flos pudoris

Obumbrante flamine.

8. Ave, virgo, pro me roga,
Te produxit synagoga

Sicut spina lilium,
Dereliquit te Judaeus
Et assumpsit sponsus Deus

In throni consortium.

9. Ave, templum Dei sanctum,
Peccatoris audi planctum

Et cordis suspiria ;
Dei coelum, Dei sedes,
Duc et rege nostros pedes

Ad coeli sedilia.