Sermo IX .

Item, sermo fratris Bonaventurae in Nativitate Domini editus Assisii coram populo, in ecclesia Fratrum ad

Missam.

Fons ascendebat e terra, irrigans universam superficiem terrae, Genesis secundo.

Moyses sanctus dux Israelitici populi, in omnibus verbis suis praecipuum habens oculum ad Verbum in carnem venturum, descripsit his verbis paucis Christi nativitatem dupliciter, scilicet ut divinis charismatibus refertam et affluentem, et ut salvandis animab us generaliter intendentem. Primum, ibi: Fons ascendebat e terra, id est Virgine gloriosa; secundum, ibi: Irrigans universam superficiem terrae, id est mundialis machinae.

Ascendit autem Christus, nascens de Virgine Matre, sicut fons puritatis aeternae munditiae ad lavandum mundum sordidum; Zachariae decimo tertio: Erit fons patens domui David et habitantibus Ierusalem in ablutionem peccatoris et menstruatae.

Fons veritatis aeternae sapientiae ad illuminandum mundum tenebrosum; Apocalypsis ultimo, secundum litteram, quam cantat Ecclesia: Ostendit mihi Angelus fluvium aquae vitae splendidum tanquam crystallum, procedentem de sede Dei et Agni.

Fons suavitatis aeternae gratiae ad consolandum mundum afflictum; Numerorum vigesimo: Aperi eis thesaurum tuum, fontem aquae vivae, orabat Moyses.

Fons liberalitatis aeternae gloriae ad salvandum mundum perditum; Canticorum quarto: Fons hortorum, puteus aquarum viventium etc; Ioannis quarto: Fiet in eo fons aquae salientis in vitam aeternam.

Fons sanctitatis aeternae regulae ad dirigendum mundum devium; Esther decimo : Parvus fons, qui crevit in fluvium et in lucem solemque conversus est; incepit enim ab humilitate etc.

Fons bonitatis aeternae misericordias ad reparandum mundum confractum; Isaiae duodecimo: Haurietis aquae in gaudio de fontibus Salvatoris etc.

Fons claritatis aeternae famae ad restituendum mundum infamem factum; Canticorum quarto: Hortus conclusus, fons signatus. Emissiones tuae paradisus etc.