90. Hymnus alius super eodem.

1. Morte nihil [est] certius,
Sed nos diem ignoramus,
In nobis nil prudentius,
Quam nos ipsos cognoscamus,
Nil nobis est utilius,
Quam parati maneamus.

2. Ubicunque invenimur
Nos peccatis innodati,
Ibi poena iam punimur,
Si non simus nos mundati,
Sed, si bene nos lavamur,
Sumus Deo nimis grati.

3. Anni mei discurrerunt
Quasi umbra, labens flumen,
Dies mei abierunt
Incedentes per discrimen,
Actus mei perierunt
Non sequentes lucis lumen.

4. Quid doleo, si morior
Et recedo a praesenti?
Nam meus status melior,
Manebo in re valenti,
Requiescamque laetabor
Loco sanctoque caelesti.

5. Non quiescit quis per horam,
Dum vivit, non est requies,
Dum in mundo trahit moram,
Peccat in die septies,
Est delictum semper coram
Ipsoque mali species.

6. Quis fallit in putamine,
Vano viget cogitatu,
Cruciatur (hic) certamine,
Est [hic] absens ab optatu,
Putat laetari lumine,
Sed hic caret bono statu.

7. Si adfluunt divitiae.
Nolite cor apponere,
Dant causam hae tristitiae,
Solent latrones rapere,
Dantur viro malitiae,
Videmus eas fallere.

8. Quid tardas te reducere
Ad veram paenitentiam ?
Quid protrahis convertere?
Relinque tu dementiam,
Procura Deum quaerere,
Ut videas clementiam.

9. Redde partem iuventutis
Tuae sancto Deo nostro,
Ante tempus senectutis
Tu legaris in registro,
Memor esto tu salutis,
Haec [in] fide tibi monstro.

10. Iucunda sit iuventus
Tua Deo nostro iusta,
Sit bona tua senectus,
Crede iam, non dico frustra,
Place Deo tu dilectus,
Mens in malum sit robusta.