Sermo X .

Item, sermo fratris Bonaventurae editus in Conventu Rothomagensi coram populo terrae et clero, praesente Fratre Rigaldo, archiepiscopo civitatis.

Produxit Dominus Deus de humo lignum vitae in medio paradisi, Genesis secundo .

Circa Christi novam per carnem nativitatem his verbis quatuor describuntur, scilicet mirifica lib eralitas ex parte Dei Patris mundo condescendentis, ibi: Produxit Dominus Deus, quasi gratis mittendo et incarnari Filium constituendo; gloriosa fecunditas ex parte Virginis singulariter parientis, ibi: dehumo, id est Virgine de caelo fecundata et benedicta divinitus; suavifica gratiositas ex parte almae Prolis nascentis, ibi: lignum vitae, quasi cibum perpetuum animarum et praemium earum; gratifica pietas supernae providentiae, universaliter omnibus tam summum beneficium offerentis, ibi: inmedio paradisi, id est congregationis salvari volentium.

Circa haec omnia nota, quod in Christo nascente tanquam in vero ligno vitae, exhibito huic mundo ad pastum salvationum, invenimus duodecim nobiles conditiones, nobis salutares secundum duodecim proprietates ligni illius vitae materialis.

Ipsum enim Christum natum sicut verum lignum vitae invenimus mirabiliter radicatum propter unionis naturae divinae et humanae inseparabilitatem; Genesis tertio : De ligno, quod est in medio paradisi, praecepit nobis Deus, ne comederemus ei ne tangeremus illud, id est, ne curiose eius naturam inquiras

Mirabiliter statura procerum propter Maiestatis et comprehensionis (?) aeternitatem; Apocalypsis ultimo: Beati, q ui l avant stolas suas in sanguine Agni, ut sit potestas eorum in ligno vitae etc

Mirabiliter humore fecundum propter triformis gratiae fertilitatem; Psalmus : Erit tanquam lignum, quod plantatum est secus decursus aquarum quod fructum suum dabit in tempore suo.

Mirabiliter ramis expansum propter zeli universalis animarum caritatem; Apocalypsis ultimo: Ex utraque parte fluminis lignum vitae, quia venit propter Iudaeos et Gentiles.

Mirabiliter floribus decorum propter desideriorum aeternorum pulcriformitatem; Ezechielis trigesimo primo : ''Omne lignum paradisi Dei non est assimilatum illi et pulcritudini eius.

Mirabiliter frondibus venustum propter sapientialium documentorum multiformitatem; Proverbiorum tertio: Lignum vitae est his qui apprehenderint eam, et qui tenuerit eam beatus. ''

Mirabiliter fructibus suavificum propter luciformium meritorum sanctitatem; Proverbiorum undecimo : Fructus iusti lignum vitae.

Mirabiliter umbra amoenum propter afflictorum et infirmorum et peccatorum pietatem; Proverbiorum decimo tertio: Lignum vitae desiderium veniens.

Mirabiliter virore perfusum propter morum elegantiae incessantem religiositatem; Levitici vigesimo tertio : Sumet is vobis ramos ligni densarum frondium etc.

Mirabiliter fulgore coruscum propter contemplationis supercaelestis claritatem; Genesis tertio: Collocavit Cherubim ad custodiendam viam ligni vitae.

Mirabiliter odore gratificum propter orationis continuae virtuosam devotionem; quarti Esdrae secundo : Lignum vitae erit illis in odore unguenti.

Mirabiliter conversatione salvificum propter sanguinis in cruce aspersionem; Sapientiae decimo quarto: Benedictum lignum, per quod fit iustitia.