90. De Beata Maria V.

1 a. Salve, virgo generosa,
Spina carens, salve, rosa;

1b. Salve, dulcis spes reorum,
Salve, fragrans flos sanctorum.

2 a. Salve, per quam lux est orta,
Castitatis, salve, schola ;

2 b. Meta mortis, vitae porta,
Virgo mater facta sola.

3 a. Te vox laudat prophetica,
Figurata per mystica
Es, dum rubus incombustus.
Dum ros caeli subit vellus.

3 b. Tuum Deus intrat alvum,
Ut Habacuc subit lacum ;
Misaeli parcit ignis,
Te non urit aestus carnis.

4 a. Salve, salus credentium,

Salve, virtus debilium,

Salve, decus honestatis,

Salve, mater deitatis.

4 b. Profert apis virgo fetum,
Incorrupta parit Christum,
Florem virga, stella solem,
Vermem manna, virgoprolem.

5 a. Salve, sedes verbi Dei,

Salve, splendor speciei,

Salve, gemma pietatis,

Salve, lampas claritatis.

5 b. Salve, virgo ferens fructum,
Salve, tollens mundi luctum,
Salve, purgans Evae naevum,
Salve, mundum sanans reum.

6 a. Imperatrix angelorum,
Moles tolle peccatorum,
Nato tuo prece pia
Te laudantes concilia.

6 b. O Maria, Christum ora
Ut in examinis hora
Sentiamus propitiam
Iudicantis sententiam.