86. De paenitentia non differenda.

1. Die, homo, cur abuteris

Discretionis gratia,
Cum vitae viam deseris

Et tendis ad supplicia?

Saluti praefers otia

Et pretiosis vilia
Nec metu poenae flecteris
Nec spe salutis traheris,

Ut summa quaeras gaudia.

2. Quid valet mundi gloria,

Vide, quam sic amplecteris,
Multa vides iudicia,
Qui scienter deciperis,
Mundum, qui fugit, sequeris
Et cum labente laberis
Sequendo transitoria,
Sic bona permanentia

Sub aure surda praeteris.

3. Certe non excusaberis
Dissimulando talia,
Nam, si sic subterfugeris,
Post restat conscientia,
Quae non tacet latentia,
Et divina iudicia
Declinare non poteris,
Sed, si convictus fueris,
Patet mortis sententia.

4. Non confidas de venia,
Si sero paenitueris,

Dies est peremptoria,

Quam nisi tu praeveneris
Fructu condigni operis
Et reatum purgaveris,

Erit tibi miseria

Absque misericordia

In aeternum cum miseris.

5. Ergo vides, cum veneris
In iudicis praesentia,

Qui tibi, prout egeris,
Iusta reddet stipendia,
Ne gloriosa patria
Tua te. privent vitia,

Nam, si mundus occurreris.

Cum iustis sociaberis
In aeterna laetitia.