91. Super "Magnificat".

1. Ave, nostra spes in vita,
Maria sanctificata,
Digne appellaris ita,
Virgo mater ter beata,
Vera mundi margarita,
Nobis pro salute data,
Indulge nobis debita,
Cuncta largire rogata.

2. Magnificas propaginem,
Quae simul cuncta creavit,
Te ad similitudinem
Suam propriam formavit,
Te praeelegit virginem
In matrem et consecravit,
Ut hominum propaginem
Redimeret, quae peccavit.

3. Et merito et numero
Tu sola sanctificata
Atque a matris utero
Virgo semper conservata,

Castitatem Deo vero
Voves sibi consecrata
Ejusque salutifero
Dono gaudens es laetata.

4. Quia Deus munditiae
Tuae et humilitatis
Cernens, carnem miseriae
Sumpsit et humanitatis,
Portasti regem gloriae
Hil habens anxietatis,
Manente pudicitiae
Ploreque virginitatis.

5. Quia mater genuisti,
Dicta es, virgo, beata,
Generosa exstitisti,
Quamvis ancilla vocata,
Vere digna tu fuisti,
Olim stirpe David nata,
Virgo, mater Jesu Christi,
Esto nostra advocata.

6. Et nunc summe creatoris
Sponsa gloriosissima
Atque mundi salvatoris
Mater pretiosissima,
Virgo insignita moris,
Stirpe generosissima,
Omnis laudis et honoris
Ex merito dignissima.

7. Fecit te, qui per te natus
Deus de Deo filius,
Sed pro nobis generatus
Apparuit propitius,
Circumcisus, tumulatus,
Sugens ascendit altius,
Ipse, mater, advocatus
Per te fiat atque, pius.

8. Deposuit et posuit
Omnium iniquitates
Super se atque tribuit
Aeternas felicitates,
Sic erit, ut est et fuit,
Quando creans potestates,
In tempore dum induit
Nostras imbecillitates.

9. Esurientes cibavit
Ferculo substantiali
Atque corda illustravit
Lumine spirituali,
Veram panem se donavit
Suis more filiali,
Tua prece, quos creavit,
Salvet dono speciali.

10. Suscepitque supplicia
Propter hominum peccata,
Ut ejus beneficia
Sanarent mortificata,
Donarent quoque praemia
Nobis olim heu ablata,
Hunc placare, virgo pia,
Vera mater, cujus nata.

11. Sicut jam es in copia
Omnium deliciarum
Et larga das suffragia
Hac in valle lacrimarum,
Nostra dele contagia
Atque genera poenarum,
Ut pariter in patria
Te fruamur, jubar clarum.

12. Tibi honor et gloria
Nobis tuumque juvamen
Detur, virtus, victoria
Contra hostium conamen,
Ut sumptis a miseria
Pater, natus atque flamen
Nobis concedat gaudia
Hic et in aeternum. Amen.