92. De Visitatione BMV.

1. Hunc diem festum veneremur omnes,
Quo Deus nostrum miseratus aevum
Cum novis signis oriens ab alto
Visitat orbem.
2. Cesset humani generis quaerela,
Virginis claustrum subiit redemptor,
Gyrat et coelum recubans sub arto
Tegmine matris.

3. Dum latet subtus trabea decenti,
Angelus cedit repetens Olympum,
Transilit clivum gravidata divo
Munere virgo.

4. Obviam fetae sterilis vocata
Clamat, ut sentit puerum moveri
Inter obscuras positum latebras
Carcere ventris.

5. Parvulus miles Dominum salutat
Et suum complet Dominas clientem,
Hesperus tandem rutilat corrusco
Lumine solis.

6. Fit sator rerum similis creatis
Parque censetur catulus leoni,
Par Deus servo, minimus giganti,
Cedrus Hysopo.

7. Quod cborus vatum pariterque regum
Semper optabat fruitur nec ipso,
Lumen in vulvae tenebris refulgens
Percipit infans.

8. Per duos muros uteri sacrati
Principem pacis meruit videre,
Hinc agnus lustrat, radius perennis
Luminis, alvum,

9. Ceteri vocem pueri vagitus

Sorde nascentes referunt priorem,
Unus in cunctis alacris Joannes
Praevenit ortum.

10. Patris aeterni genitura praesens
Consecrat vatem solidatque servum,
Virgo cum plausu cecinit, futura
Et vetus aetas.
11. Quam Deo dignus thorus est uterque
Prole cum sancta meritis onustus,
Qua piae matres teneros refundunt
Germine foetus.
12. O Dei nostri genitrix Maria,
Visita mentes hodie tuorum,
Ut tuo fructu satietur agmen
Criminis expers.

13. Qui tuo Christo reparas lucernam
Non palam sed sub modio latentem,
Hunc chorum turmis precibus Mariae
Junge supernis.