98. Psalmus L. Beatae Mariae V. laudibus accommodatus.

1. Miserere, mater Dei,
Miserere huius rei,
Rogo, miserere mei,

Fons misericordiam
Miserationis multae
Mater, quidquid egi stulte,
Nequiter vel inconsulte,

Dele, datrix veniae.

2. Christi mater, virgo munda,
Peccatorem hunc emunda
Pietatis lavans unda

Peccati contagium.
Meum agnosco reatum,
Delictis attenuatum,
Pondus aufer, ne peccatum

Mihi sit contrarium.

3. Filio tuo peccavi,

Placa tu, quem irritavi,
Hostis ne sermone gravi

Vincar in iudicio.
Sola quae tu non dolorem
Passa tuum paris florem,
Solve natum peccatorem
A peccati vitio.

4. O dilectrix aequitatis,
Mihi summae veritatis
Manifesta lucem gratis,

Sole, luna pulchrior.
Hysopo compungitivae
Virtutis et purgativae
Asperge me, fac, ut nive

Niteam candidior.

5. Metum tolle mortis dirae,
Cum damnabit dies irae
Reprobos, et fac audire

Gaudium laetitiae.
A peccatis meis verte
Vultum tuum et diverte
Me ab ipsis, ut sic per te

Reddar innocentiae.

6. Cordis pravi purgans sordem
Fac, Maria, tibi cor dem,
Spiritum Deo concordem

Meis dans visceribus.
Roga fructum ventris tui,
Ne a luce vultus sui
Repellat, sed donet frui

Donis spiritalibus.

7. Tuum mihi salutare,

Iesum dona, quem precare,
Ut dignetur mihi dare
Principalem spiritum.
Doce me virtutum viam
Veramque philosophiam,
Qua profectum verum sciam,
Verbum ex te genitum.

8. Libera me, spes reorum,
A sanguine peccatorum,
Ut exsultem commissorum

Impetrata venia.
Mentis aegrae morbum cura,
Quo te laudem laude pura,
Aperi te laudatura
Cordis mei labia.

9. Iesu mater, nato cara,
Holocaustum in me para,
Cor ardens, in cordis ara

Sanctum desiderium ;
Spiritum contribulatum
Atque cor humiliatum
Mihi praesta, quod est gratum
Deo sacrificium.

10. O benigna, fac benigne,
Da mirari posse digne
Salutis signum insigne

In caeli palatio.
Hoc accepta, mater Dei,
Holocaustum voti mei;
Tibi, precor, buius rei

Grata sit oblatio.

11. Salve, nostri salutaris
Parens, sed ignara paris,
Salve, rosa puellaris,

Salve, mundi lilium.
Ave, mater salvatoris,
Mater munda, miri moris,
Audi, licet peccatoris,

Laudes et praeconium.

12. Offer quoque tuo nato
Grato et propitiato
Holocaustum pro peccato

Carmen hoc Davidicum.
Ne permittas mihi claudi
Aurem tuam, sed exaudi
Immolantem tuae laudi

Suppliciter canticum.

13. Per saecla metae nescia
Sit tibi, virgo Maria,
Laus, honor, virtus, gloria,
Decus et imperium.