Sermo XVI .

Item, sermo fratris Bonaventurae in die Nativitatis, Parisius, coram rege Franciae et filiis et consilians, in aula regali, circa Vesperas.

Vobis apertus est paradisus, plantata est arbor vitae, quarti Esdrae octavo .

Caelestis Angelus, supercaelesti radiatus illustratione, loquens ex persona Patris aeterni pro hodierna solemnitate novae nativitatis per carnem, populum salvari volentem alloquitur verbis assumtis, in quibus Christi nativitatem describit dupliciter, scilicet ut fontale principium salutis humanae, et ut universale confugium omnis animae. Primum, ibi: Vobis apertus est paradisus; secundum, ibi: plantata est arbor vitae.

Circa omnia nota, quod Christus in sua nativitate et per totam vitam factus est arbor vitae generi humano ad salvationem et imitationem et refectionem; cuius radix fuit caritas; Ecclesiastici vigesimo quarto : Radicavi in populo honorificato.

Stipes fuit humilitas; ad Philippenses secundo: Humiliavit semetipsum, factus obediens usque ad mortem, mortem autem crucis; propter quod et Deus exaltavit illum.

Rami fuerunt caelestium desideriorum aviditas; Ecclesiastici vigesimo quarto : Quasi terebinthus extendi ramos meos, et rami mei honoris et gratiae.

Flores fuerunt religionis et honestatis mores; Ecclesiastici vigesimo quarto: Flores mei fructus honoris et honestatis.

Folia fuerunt verborum sanctorum aedificationes; Ezechielis quadragesimo septimo : Folia eius ad medicinam; et Apocalypsis ultimo: Folia ligni ad sanitatem gentium.

Fructus fuerunt sanctitatis et veritatis et bonitatis operationes; Proverbiorum tertio : Primi et purissimi fructus eius.

Umbra fuit conversationis pietas et famae suavitas; Danielis quarto: Sub umbra illius requieverunt omnes volucres caeli.

Fragrantia fuit orationis virtuosius; quarti Esdrae secundo : Lignum vitae erit illis i n odorem unguenti.

Viriditas fuit devotionis ubertas; Proverbiorum undecimo: Fructus iusti lignum vitae.