97. Hymnus seu oratio ad Deum.

1. Deus meus, auctor pacis
Et bonorum es largitor,
Fidos tu regnare facis,
Vivit tuusque servitor,
Es amator veritatis,
Esto mihi tu protector.

2. Deus, cum sum recessurus
De hoc praesenti saeculo,
Sis benigne recepturus
Et me tu salva denuo,
Non sis cuncta discussurus
De peccatore devio.

3. Iam peccavi tibi soli
Mala coram teque feci,
Me deserere tu noli,
In virtute quod defeci,
Fui omnis capax doli,
Me ne tradas poenae neci.

4. Mihi redde salutaris
Laetitiamque gaudium,
Pio corde movearis,
Ostende tuum prandium,
Orna me tu rebus claris,
Non sim in nocte vallium.

5. Tu generis nobilitas

Tuque actus ad parcendum,
Tu solus es benignitas
Tuque praebes ad gaudendum,
Tu donum, summa largitas,
Tuque donas ad videndum.

6. Tu misericorsque clemens
Tuque pius miserator,
Tu gratias retribuens,
Tu es mitis et amator,
Tu nobis es compatiens,
Tu nostrorum es salvator.

7. A te medela, sanitas,
Tu efficax defensio,
A teque amor, caritas,
Tu salubris subventio,
A te viarum claritas,
Tu gentium redemptio.

8. Non diffidas tu, peccator,
De peccatis et commissis,
Deus tui miserator,
Si contritus es in ipsis,
Est [hic] tuique salvator,
Si ipsum timens diligis.

9. Deus quaerit cor contritum
Et hic humile non spernit,
Si peccavit infinitum,
Legem Dei non discernit,
Paenitentia munitum,
Deus quem salvandum cernit.

10. Vos, peccatores, agite
Contriti paenitentiam,
Non fidem, spem dimittite,
Tenete confidentiam,
Vos alienum reddite
Et quaerite clementiam.

11. Deus tu creationis,

Me tu creans creaturam,
Deus tu dilectionis,
Me fac ipsam laetaturam,
Deus tu redemptionis,
Me fac eam salvataram.