99. Cursus de B. Maria V.
Ad Laudes.

1. Caeli porta, nobis orta,
Virgo sancta, cerne quanta
Labe dolet, peius olet
Totus mundus furibundus.
Die, quid spectas? vias rectas
Da, perimus; cum tui simus,
Cur nos deseris in acie?

2. Placa natum tuum gratum,
Quod dignetur, cui debetur
Laus aeterna in superna,
Hos salvare, quos amare
Angit poena, forti vena
In hoc mari fluctuari,

Cum sit abundator gratiae.

3. Pangit, angit, voce clangit
Plebs fidelis verbis, melis
Ad te, stella, Dei cella;
Recordare, virgo, quare
Pracelecta sis effecta
Mater Christi; genti tristi
Da salutem tua facie.

Ad Primam.

1. O aurora rutila,
Dies, noctem mutila,
Sol, terram illumina,
Quae super cacumina
Caeli resides sublima.

2. O magnum mysterium!
Te laudat imperium
Terrenum et caeleste;
Nos liberes a peste,
Ne decidamus ad ima.

3. O vas, virgo, gratiae,
Fruens Dei facie,
Tibi laus et gloria ;
Confer adiutoria,

Regnans post Christum prima.

Ad Tertiam.

1. Nata, natum adora,
Sancta, sanctum honora.
Munda, mundum decora
Per tua suffragia.

2. Praeclara, clarum placa,
Sic iusto, iusta, vaca
Et regem regno paca,
Tolle necis plagia.

3. O digna, dignam laude
Fecit factor te, gaude,
Stratos levas a fraude
Relaxans obstagia.

Ad Sextam.

1. Iesse florem produxit,
Flos fructum exstruxit,
Fructum sapientiae,
Plantam paenitentiae
Sacro beante flamine.

2. Is flos, virgo, fuisti,
Quae fructum peperisti,
Christum, fructum salutis,
Mirificae virtutis,
Mirabili velamine.

3. Virens arbor dulcoris.
Ramus magni decoris,
Fructum nobis largire,
Quo iamiam resilire
Possimus a peccamine.

Ad Nonam.

1. Cardo caeli,

Punctum meridiei,
Mater veli

Regnantis Galilaei,
Lux perfecta et erecta,

Lumen nobis infunde.

2. Aufer labem

Adgravantis criminis,
Redde trabem

Fortis adiuvaminis,
Ne obscena ferox poena

Nos puniat abunde.

3. Sed gratia

liberantis pneumatos
Nos satia

Et dulcore neumatis,
Quo repleti simus laeti

Perpetuo fecunde.

Ad Vesperas.

1. Ave, clarum miraculum,
Prophetarum oraculum,
Summi solis umbraculum,
Libri vitae signaculum,
Ave, clavis deitatis.

2. Ave, qua lapsi curantur
Et curati confortantur,
Confortati confirmantur,
Confirmati collaetantur,
Ave, smigma suavitatis.

3. Ave, templum Salomonis,
Perornatum miris donis,
Obiectum divi sermonis,
Cum imis summa componis,
Ave, codex trinitatis.

Ad Completorium.

1. Te lucis sinceritas,
Precamur, proselitas
Gentes Christi protege
Hoc nocturno tempore.

2. Cedat somni gravitas,
Et quietis lenitas
Festinet accedere
Cum salutis opere.

3. Tibi laudis pietas
Et honoris bonitas,
Trinitatis nomine
Semper vale prospere.