98. Hymnns de cognitione et regimine.

1. Ante tempus sit paratus
Homo paenitens, contritus,
Sit virtutibus ornatus
Sacramentisque munitus,
Ut cum fuerit vocatus,
Hic tractetur ut amicus.

2. Iam non proderit clamare,
Cum venerit iudicium,
Homo nolit se artare
Ad tantum praeiudicium,
Non valebit procurare,
Ut vitet hic supplicium.

3. Nam cum homo est inermis
Et non defert secum arma,
Ruit quasi vilis vermis,
Manet victus sine palma,
Non volabit quis cum pennis,
Habet ipse mala damna.

4. Cum quis exspectat dominum
Vel amicum vel coniunctum,

Procuret hic hospitium

Et retineat cor mundum,

Provideat consilium,

Paret id, quod sit iucundum.

5. Satis Dominus turbatur
Videns domum tenebrosam,
Namque ipse contemplatur
Videns domum luminosam,
Satis ipse delectatur
Videns ipsam gratiosam.

6. Piger semper mendicabit,
Gravabitur inopia,
Prudens homo vigilabit
Perficiens iam opera,
Deus illum coronabit,
Quem videt in vigilia.

7. Tu, Deus, non discutias
Quae feci mala opera,
Sed mihi tu indulgeas,
Non damnet me miseria,
Me non a te proicias,
Sed me corona gloria.