93. Planctus de temporum nequitia.

1 a. Advertite, percipite,
perpendite, cunctorum
populorum agmina.

1 b. Quantis mundum fraudulenter
improbant malis, turbant
et conculcant vitia.

2 a. Principes, satellites

ac praepotentes, ignea,
dum derident, et seducunt
et mergunt in tartara,

2 b. Iudicantes impia

iudicia tyrannica
et super innocuos
falsitatis ingenia.

3 a. Et dira conterentes
pauperum ferocia,

3 b. Mites et vesania

cedentes malitia,

4 a. Tendunt omnes iudicantes
ad maioris doni lucra;

Praesidis ante tribunal
vox pupilli plorat frustra,

Meliorem tenet locum,
quem honorant praemia.

4 b. Danti parcunt et succurrunt
principum praesidia,
Nulla paene iam virescunt

caritatis germina,
Bona cadunt, mala surgunt,
immutantur vitia.

5 a. Sic deludit Dei formam
daemonis versutia.

5 b. Miserere, Deus pie,

qui regnas immortalis

6. Per terrena saecula,
Mundi calcans crimina
Perenni victoria.