98. Ad B. Mariam V.

1. Mater sancta Dei, fuga noctis, origo diei,
Luminis aetberei stella, memento mei.
Per te de sede sophia venit ad ima,
Hinc rursum sursum trabis infima tu, via prima.

2. Tu requies, species, facies et manna saporis,
Nutrix, adjutrix, tutrix in agone laboris.
Tu libanus, platanus, clibanus per flamen amoris,
Balsamus et calamus, thalamus, spiramen odoris.

3. Hortus conclusus, perfusus, messis abundans,
Fons illibatas, signatus, flumen inundans,
Fons saliens, indeficiens, stillans bonitate,
Praesidium, pia virgo, tuum tribui precor a te.

4. Stella decoris, cella pudoris, mater honoris,
Stella nitoris, gemma valoris, lima doloris,
Ad venam veniae venio, veniam mihi quaero,
Te portum, portans portantem sportula, spero.

5. Summe decor, te corde precor demissus in aequor,
Mente nitor te, virgo, sequor, languentibus aequor,
Cunctis sis grata, cunctis sata, non tibi nata,
Gemmis gemmata, tua sunt sata cantica lata.

6. Tu Jaspis grata, cristallus, ebur, therebinthus,
Chrysolythi pretium servans, pretiosa jacinthus,
Cujus ad obsequium Cherubim dant et Seraphim thus,
Cunctis praelata tu filia regis ab intus.

7. Sancta Dei genitrix, tu lapsorum relevamen,
Taedia ne pariam, dabo sermoni moderamen,
Quamvis peccator tibi fecerit hoc modulamen,
Tu tamen esto sibi tutamen in omnibus horis.