99. De Beata Maria V.

la. Virgo, virga ligni vitae,
Perditionis avitae
Reparandae stadium ;

1b. Virgo, cuius flos et fructus
Fixus ligno tersit luctus
Evae culpa flentium.

2 a. Virga fecit aquas stare,
Plebs Moysi transit mare,
Pharaoque mergitur:

2 b. Virga cruce Christus fregit
Stygem, ex quo suos legit,
Et hostis confunditur.

3 a. Virga Aaron plena flore
Sacerdotis in honore
Protulit amygdala ;

3 b. Virgo, virga novae legis,
Sacerdotis es et regis
Unctionis fiala.

4 a. Virga de radice Iesse

Tu es, virgo, quam te esse
Isaias cecinit:

4b. Virgo, virga, florem istum
Protulisti, Iesum Christum,
Nec florere desinit.

5 a. Virga Ioseph florem dedit,
Et columba sancta sedit
In eius cacumine;

5 b. Virgo, Ioseph desponsata,
Iam florescis obumbrata
Sancto Dei flamine.

6 a. Virga, tuo dulci tactu
Reos mente, verbis, actu
Deo reconcilia ;

6 b. Virgo, tuo nos conductu
Satiemur tuo fructu
In perenni gloria.