104. De Beata Maria Virgine.

1. Virgo Dei genetrix mundique potens reparatrix,
Regula virtutis, divini forma decoris,
Tu primos lapides vario splendore micantes
Excellis merito signasque decore venusto.

2. Iaspidis insignem fidei virtute virorem

Exprimis imprimis, hinc prolis honore bearis,
Qui vetus a populo solvit phantasma redempto.

3. Spes in caeruleo te vestit honore ''sapphiro,
''Quae regis mater cum virginitate refulges,
Digna Dei solio caeloque serenior ipso.

4. Tamquam chalcedon caelestis canduit ardor
In te, stella maris, divini exemplar amoris,
Quae pulchra ut luna es, ceu sol electa refulges.

5. Herbida vernantis species et grata ''smaragdis
''Nec mediocris honos te prospicit, inclita virgo,
Quae fons signatus vernas conclusus ut hortus.

6. Gratia sardonii te signat honore triformi,
Cuius mens humilis candentia lilia vincit,
Pulchrior ipsa rosis niveo splendore pudoris.

7. Sardius ex toto rubet ut cruor ordine sexto,
Quo rubuit Christus hora sexta crucifixus,
In quo purpuream meruisti passa coronam.

8. Aurea chrysolithi te forma notat speciosi,
Quod, Christi genetrix, regum regina probaris,
Cuius es a dextris induta cycladibus aureis.

9. Limpidus et purus ceu sol in aqua radiatus
Digne confertur tibi, virgo Maria, ''berillus,
''Cuius ab intacta sol iustitiae micat aula.

10. Maximus in pretio primusque decore ''topaton
''Aetheris ac fulvi speciem simul exhibet auri,
In quibus arridet tua virtus et meritum ingens,
Quo superos superas, melior mortalibus exstas.

11. Lumine purpureus, facie viridis ''chrysoprassus
''Distinctusque auro tua fert insignia, virgo,
Quae solido fidei prudens patiensque fuisti.

12. Prasso guttatus viret ut maris unda ''iaeyntus,
''Et tu, nostra salus ac mundi praeclue sidus,
Virtutum titulis in nostra carne notaris.

13. Optime purpureus ac suave rubens ''amethystus
''In te virtutis specimen speciale refundit,
Regia progenies christorumque inclita proles,
Qua fulsit mundo verus rex atque sacerdos.