103. Ad B. Mariam V.

1. Ave, arca deitatis,
Aula summae majestatis,
Fons totius bonitatis.

2. Ave, balsamo suavior,
Angelis laude dignior
Et cunctis sanctis sanctior.

3. Ave, convallis lilium,
Nobis post hoc exsilium
Ostende tuum filium.

4. Ave, dulcis mellis unda,
De faece mea profunda,
O fecunda, me secunda.

5. Ave, Evae liberatrix,

Creat urae recreatrix,

Cordium illuminatrix,
6. Ave, fulgens solis cella,

Coeli splendor, maris stella.

Mater simul et puella.
7. Ave, gemma speciosa,

Gelu non attrita rosa,

Virga Jesse fructuosa.
8. Ave, hamus caritatis,

Plenitudo pietatis,

Tu me mundes a peccatis.
9. Ave, inventrix gratiae,

O genitrix laetitiae,

Tu speculum munditiae.

10. Ave, caritate plena,

Fons signatus, vitae vena,
O quam dulcis, quam serena.

11. Ave, lumen angelorum
Expurgatrix vitiorum,
Miseratrix miserorum.

12. Ave, mater Jesu Christi,
Verbum verbo concepisti,
Serva me a morte tristi.

13. Ave, nubes pluviosa,
Coeli porta, lux jocosa,
Imperatrix gloriosa.

14. Ave, hortus voluptatis,
Plenitudo pietatis,
Tu me mundes a peccatis.

15. Ave, parens absque pari,
Me in mortis torculari
Non permittas condemnari.

16. Ave, quae es vitae via,
Dulcis, clemens, casta, pia,
Spes reorum, o Maria.

17. Ave, nubes visionis,

Vellus madens Gedeonis,
Sponsa prudens Salomonis.

18. Ave, stella luminosa,
Caritate radiosa,
Florens vitis generosa.

19. Ave, virginum regina,
Rosa sine culpae spina
Et dolorum medicina.

20. Ave, Christo praenotata,
Virgo mater illibata,
Super coelos exaltata.

21. Ave, Jesse flos pudoris,
Pia proles, vas honoris,
Fons dulcoris, stilla roris.

22. Ave, zima veri David,
Auster lenis te perflavit
Et perfiando fecundavit.