98. Pro Vacatione in Natali Domini.

1. Congaudentes exsultemus,
Exsultantes collaudemus

Deum, Dei filium ;
Deum, qui nos visitavit
Et in terra se monstravit

Nostrae carnis socium.

2. Venit nostrae spes salutis,
Deus pacis et virtutis,

Deus, dator gratiae;
Verbum patris incarnatum
Corpus sumit animatum

Carnis utens specie.

3. Ecce, dies specialis,
Vitae causa principalis,

Salutis praeambula;
Fit Maria virgo mater,
Mittit natum Deus pater

Ad salvandum saecula.

4. Virgo parit, et est mirum,
Virgo nullum passa virum

Deum parit hominem ;
Tumet venter virginalis,
Nec corrumpit partus talis

Incorruptam virginem.

5. Nato mundi salvatore
Novo gaudet terra rore,

Caeli gaudent sidera ;
Terra novum habet regem,
Dat rex novus novam legem

Legis complens opera.

6. O quam felix istud Ave,
Quam praeclarum, quam suave

Fuit verbum nuntii !
Illud verbum salutavit
Et puellam impraegnavit
Partu novi filii.

7. Consummatur in Maria
Prophetarum prophetia

Tot per vaticinia ;
Stella praeit novum solem,
Virgo parit novam prolem,

Virgo viri nescia.

8. Ut nos ducat ad salutem,
Carnis sumit servitutem

Summi patris filius ;
Lactis sumit alimenta,
Qui gubernat elementa

Potens et propitius.

9. Lex impletur et scriptura,
Fit creator creatura

Sine viri semine;
Ut sit mundi reparator,
Creatura fit creator

In Maria virgine.

10. O magister, vas honoris,
Pretiosi flos odoris,

Fluentum scientiae,
Te clamantes exoramus,
Nos permittas, ut petamus
Fines dulcis patriae.

11. Nos ituri tibi vale,

Doctor, damus, post natale

Revertemur iterum ;
Cum ad scholas revertemur,
Omnes tibi largiemur
Largitatem munerum.

12. Iubilemus salvatori

Nos concordes cordis ori

Pura conscientia,
Laudes Christo concinamus,
Ut cum ipso gaudeamus

In perenni gloria.