107. De Beata Maria V.

Mater virgo Dei, decus orbis, ianua caeli,

Ad te clamantum suscipe vota precum.
Tu, regina poli, tu sidus praeclue mundi,

Ora pro nobis, confer opem miseris.
Tu suspirantes de caelo respice, mater,

Et ne labamur, tende, benigna, manus.
Quamvis in solio sedeas, regina, superno,

Nos tamen in terra compatienter iuva.
Placa censorem miseris, averte mucronem

Nobis atque piam concilia Dominum.
Inter fluctivagi rege nos discrimina mundi

Ac semper stella caelitus irradia,
Et, subito vita cum mors spoliaverit ossa,

Sis praesens animae, ne pereat misere.
Arce procul hostes, furvas dirasque phalanges,

Spiritus incedat per loca luciflua.
Non videat manes, Orci non sentiat ignes,

Pallentes umbras te duce profugiat.
Obviet angelicus sibi mox cum lumine coetus,

Qui ferat hunc aulam regis ad aetheream,
Rex ubi caelestis propriis partitur amicis,

Qui placuere sibi, praemia pro meritis.