99. Pro Vacatione in Natali Domini.

1. Iubilemus omnes ei,
Cuius caecis iubilaei

Dies nobis oritur,
Dies, inquam, nostrae spei,
Dies, in qua primi rei

Delictum obstruitur.

2. Sola mater excors maris
Fit Maria, stella maris,

Sol de stella nascitur;
Pia parens, expers paris,
Dum parentem tuum paris,

Natura deluditur.

3. Lux lucet nulli secunda,
Lux insignis, lux iucunda,

Iucundemur pariter,
Natus mirata natura
Creator de creatura

Carne nostra tegitur.

4. Carnis nostrae reparator
Carnem vestit, imperator

Archangelis imperans,
Omnis caro renascatur,
Verbum patris incarnatur

Carne carnem liberans.

5. Fallit norma rationem,
In hoc verbo passionem

Dum recipit actio,
Nec aufertur vis activa,
Sed in ipsam vi passiva

Fit reciprocatio.

6. Immensum claudit mensura,
Factor exit de factura,

Figulus de vasculo,
Iustitia terras visit
De supernis, quod promisit

Davidis oraculo.

7. Caelos inclinans descendit,
Quod mundus non comprehendit,

Claustro brevi clauditur,
Ille ventre puellari
Dignatus est baiulari,

Qui non circumscribitur.

8. Ne serviamus aeternum,
Regnum cuius est aeternum,

Servi corpus induit ;
Germinavit radix Iesse
Florem, quem satis expresse

Isaias innuit.

9. Virga Iesse comparatur
Et decenter adaptatur

Partui virgineo,
Sive rubus visionis,
Sive vellus Gedeonis

Sparsum rore vitreo.

10. Ezechiel non patentem
Se portam ad orientem

Vidisse perhibuit;
Ventris parit clausa porta
Virgo, de qua lux est orta
Et terris enituit.

11. Porta clausa post et ante,
Florens hortus austro flante,

Hortus fetus balsamo,
Hortus clausus florens austro,
Cuius Deus prodit claustro,

Sponsus ut ex thalamo.

12. Sine succo, sine rore
Virga leni dat cum flore

Fructum sine germine,
Virgo, per quam nobis datur
Fructus vitae, gravi datur

Sine viri semine.

13. A fructu mors emanavit,
Mundum fructus emundavit

Fracto mortis malleo,
Eva fructu nos seduxit,

14. Sacra lux nos elucescit,
Et nox eius noctem nescit

Ortum dantis luminis,
Quod ad lucem nos direxit,
Quod pedes nostros reflexit

A via caliginis.

15. Illustravit umbras praesto
Noctis huius intempesto

Veri solis radius,
In tenebras gentis missae
Lucem magnam micuisse

Notat Amos filius.

16. De nocte praevidens ista,
Ut dies, ait psalmista,

Nox illuminabitur,
Nox illustrans tenebrosa,
Legem legens legis glosa,

Legis nubes scinditur.

17. Iam aufertur sceptrum Iuda,
Synagoga sedet nuda
Fixo legis tegmine ;
Tange lyram, pange laudes,
Tu qui Christum natum gaudes
Ex Maria virgine.

18. Gaude turba, lyram tange,
Gaude manu, melos pange,

Mente tamen sobria;
Tange lyram, turba, gaude,
Pange manu, pange, [plaude],

Nato canunt omnia.

19. Assistentes tuae laudi
Nos tuere, nos exaudi,

Sancta virgo virginum,
Digna mater, tu dignare
Auxilium flagitare

Pro nobis ad Dominum.

20. A maris huius procella
Nos erue, maris stella,

Verbi Dei baiula,
In Ierusalem superna
Nos disponens per aeterna

Saeculorum saecula.