106. Hymnus alius de eodem.

1. Nos serviamus principi
Et tibi potentissimo,
Iam non valemus decipi,
Sed erimus in gaudio,
Qui cupit bene recipi,
Hic placeat altissimo.

2. Te laudent caeli desuper
Et tibi cuncti pareant,
Te laudent terrae desupter,
Omnes viventes timeant,
Te gentes ament pariter,
Te toto corde diligant.

3. Nos pigri quid [hic] dormimus,
Quid non semper vigilamus?
Nos infestat terrae limus,
Ut ad eum redeamus,
Cum de terra facti simus,
Nos ad mortem properamus.

4. Nam hora, qua non credimus,
Iam mortis cursor veniet,
Nos cunctis fide dicimus,
Ut quilibet se praeparet,
Non manemus, sed nos imus,
Ad Deum homo vigilet.

5. Nam spiritus revertitur
Ad Deumque caelestia,
Quod si mundatus cernitur,
Habebit ipse gaudia,
Sed caro iam conteritur
Se fundans ad terrestria.

6. Qui amat Dei gloriam,
Cupit ipse bonum finem,
Qui seminat zizaniam,
Metet ipse malum semen,
Qui sequitur insaniam,
Ruet ipse per discrimen.

7. Maneamus nos prudentes
Gerentes temperantiam,
Simus fortes, patientes,
Reddentes nos iustitiam,
Simus nos intellegentes,
Habentes sapientiam.