105. De Beata Maria V.

1 a. Laus est aulae virginalis,
Quod maiestas hac regalis
Dignatur descendere ;

1 b. Opus haec est trinitatis,
Solum cunctis quod beatis
Dat beate vivere.

2 a. Aula mater est intacta,
Sicut templum fabrefacta,
Quo non sonat malleus;

2 b. Ibi sceptrum, rex, corona,
Vitae panis et annona
Liquorque nectareus.

3 a. Terra namque dedit fructum,
Cor confirmat, solvit luctum,
Reddit fructus gaudium.

3 b. Hoc figurat Ruth in messe,
Caleph botro, virga Iesse,
Nucisque mysterium.

4 a. A fructu tritici,
vini et olei
Multiplicata est
nam virtus fidei ;

4 b. Regis praedivitis

sunt haec donaria,
Qui nostrae usus est
carnis substantia.

5 a. Ipse granum, ipse panis,
Liquor et nux non inanis,
Ipse solus omnia,

5 b. Quo referta fuit cella,
Dei mater, maris stella,
Mater plena gratia.

6 a. Hanc flos ornat castitatis,
Angelorum puritatis
Cognata virginitas ;

6 b. In qua res est gratiosa
Mitis, dulcis et iocosa,
Tam typus quam veritas.

7 a. Rubus non uritur,

Vellus compluitur,

Sol retro flectitur,

Et pecus loquitur,

Anus fit gravida.

7 b. Fons novus oritur,
Fanum destruitur,
De petra bibitur,
Propheta pascitur,
Mitescunt rabida.

8 a. Fornax cedit
Et non laedit,
Sed oboedit
His, quos credit
Mori rex incendio.

8 b. Manna datur,
Hinc creatur
Et formatur,
Quo signatur

Haee nova creatio.

9 a. Adae plasmatio,
Arcae constructio,
Iordanis siccitas,

9 b. Maris divisio,
Fiscellae ratio

Signant te, novitas.

10 a. Sal respergit fonte totum
Et camelis fessis potum
Dat Rebeccae hydria.

10b. De conceptu Sara ridet,
Se calcari serpens videt,
Canit tympanistria.

11a. Aere serpens simulatur,
Sputo lutum temperatur
Cherubimque obumbratur
Propitiatorium.

11b. Muliere vir ambitur,

Porta clausa pertransitur,
Gigas currit, via scitur,
Floret vallis lilium.

12 a. Sol sub nube non densatur,
Horto clauso fons signatur,
Sine manu mons secatur,
Stella solem praeconatur,
Sol de stella rutilat.

12 b. Stat praesaepe feno plenum,

Boves sumus, caro fenum,

Christi corpus tam serenum

Nobis cibum dat amoenum,

Si cor ad hoc vigilat.

13 a. Ad honorem tuum iure

Famulantur hae scripturae,
Sit de nobis tibi cura,
Pia virgo, mater pura,
Ut simus in gloria ;

13 b. Ubi nec cras, nec hesternum,
Ubi semper hodiernum,
Ubi salus, ubi vita,
Ubi pax est infinita,
Ubi Deus omnia.