107. De Beata Maria V.

1 a. [Salv]e, virgo, vas pudoris,
Salve, ma[ter salvatoris]
Salve, doctrix et lux mo[ris
Omni die, cunctis horis]
Salve, mater Maria.

1b. [Salve, mater deitatis,
Verb]um gestans caritatis,
Et in arca castitatis
Spem futurae libertatis
Praebens et solacia.

2 a. Ave, virgo dives Deo,
Ave, portus patens reo,
Ave, lux et gratia.

2 b. Ave, mundi reparatrix,
Ave, caeli imperatrix,
Nostra prima gaudia.

3 a. Salve, vitae condimentum,
Evae leniens lamentum,
Vetus per te testamentum
Ruit, surgit sacramentum
Resignans caelestia.

3 b. Salve, boni fundamentum,
Castitatis ornamentum,
Caritatis dans unguentum,
Sanitatis in augmentum
Temperans carnalia.

4 a. Ave, Deum gestans alis,
Ave, malas iungens malis
Et labellis labia.

4 b. Ave, Marthae functa cura,
Ave, maesta circa plura
Eximens obsequia.

5 a. Salve, salus, decus, vita,
Astris poli redimita,
Illuc tecum nos invita,
Ubi gaudes infinita
Pace et laetitia.

5 b. Salve, lapsi relevatrix,
Errabundi revocatrix,
Caeli, terrae mediatrix,
Utriusque solidatrix,
Christo nos concilia.

6 a. Ave, dulcis Sunamitis,

Pulchra, casta, simplex, mitis,
Membra fovens regia.

6b. Ave, fida poli scala,
Super astra tecum cala
In superna curia.

7 a. Salve, clara maris stella,
Quae, cum hostis movet bella,
Es asylum, arcus, cella,
Ne involvat nos procella
Per haec mundi maria.

7 b. Salve, nostri vis vigoris,
Finis longaevi doloris,
Salus es summi valoris,
Honor caeli, lux splendoris ;
Tibi laus et gloria.