108. De Beata Maria V.

1. Electa et praeelecta,
Digna et dilecta
Virgo, sponsa, mater, filia.

2a. Templum summi patris Dei,
Aula verbi sempiterni,
Sacrarium spiritus sancti.

2 b. Praepotens caeli regina,
Praecelsa mundi domina,
Stella maris splendidissima.

3 a. Tu salutis medicina,
Tu redemptionis via,
Tu perennis vitae ianua.

3 b. Pia mater orphanorum,
Solamen desolatorum,
Spes invicta desperatorum.

4 a. O Maria, mater virgo,
Cadat in conspectu tuo
Nostra [haec] supplex oratio ;

4b. Miserere miserorum,
Vota suscipe tuorum,
Te monstra matrem filiorum.

5 a. Pauperum preces attende,
Opem benignam impende,
Pietatis sinum expande.

5 b. Tuo fructu satia nos,
Iesu Christo satiatos
Sociato caeli gaudio.

6. Ergo, domina benigna,
Christo nos consigna,
Virgo sancta, mater digna,
Pia dulcissima Maria.