104. Pro Vacatione Paschali.

1. Universa gens laetetur
Et festinet, ut mundetur

A peccati macula,
Christus, cunctis aegis fortis,
Factus comes nostrae sortis

Est carnali copula.

2. Novus dator novae legis,
Princeps pacis, pastor gregis,
Pro salute populi

3. Fructu ligni mors oblata,
Per parentes nostros data,

Nos dedit miseriae;
Superatur mors, et vita
Ligno nobis est largita

Dono dato veniae.

4. Vita morti dominatur,
Dum non mori dedignatur

In crucis ergastulo ;
Nobis donum largitatis
Datur, rivus pietatis

Toto fluxit saeculo.

5. Irnpletae sunt prophetiae,
Quas praedixit Ieremiae

Nobilis facundia,
Ierusalem sub tributo
Corporeo servit scuto,
Christus obit hostia.

6. Palo serpens exaltatur,
Et Iudaea liberatur

Ignitis draconibus,
Christus in cruce levatur,
Homo vermis expurgatur

A suis squaloribus.

7. Quidquid fuit in scripturis
Signis dictum et figuris,

Patens est ad oculum,
Erubescat nunc Iudaeus,
Qui non credit, quod sit Deus

Morte salvans populum.

8. Christus, actor pietatis,
In virtute baptismatis

Nos dignetur tergere;
In honore tanti regis,
Nobis est qui fortis aegis,

Cuncto decet plaudere.

9. Ergo, doctor, qui nos foves
Documentis et removes

Posse tuo vitia,
Iube, quod est in Catone,
Fessis dixit: interpone

Tuis curis gaudia.

10. Valde sumus fatigati,
Parum sumus relaxati

Nos vacantes studio;
Labor frangit cuncta dura,
Nulla res est duratura,

Si desit pausatio.