114. Oratio metrica de laude beatae virginis Mariae.

O mater matrum, materno more medere,

Parce reis et opem fer eis, miserere, tuere,

O benedicta David proles, tu manna saporis,

Tu generosa Iudith, Abigail, Hesther honoris.

Fixa polo stella, tu legis glosa novella,

Foederis arcella, Moysi duplata tabella,

Cum nato mella, quoque lac tua sancta labella

Stillent, debella vires Satanaeque flagella.

Dux morum, lux caecorum, regina polorum,

Spes veniae, fuga tristitiae, medicina dolorum.

Turbant saligia, pia respice virgo Maria,

Cum sis sola via patriae, duc, dirige, dia.

Surgens aurora, tu sancta theotocon, ora

Protinus, absque mora pro me pereunte labora.

Astripotens mater, mundi stupor et generosa,

Me perimens ater hostis petit arte perosa;

Os, cor, opus, vim, res muni, duc daque iuvamen,

Ut meritis sim pres, cum mors hinc separet. Amen.