110. De Beata Maria V.

1 a. Gaudeamus, fratres mei,
Ob honorem matris Dei
Celebrem huius diei
Agimus memoriam.

1b. Haec est glosa scripturarum,
Quae de lege tenebrarum
Umbram fugat figurarum
Et extersit scoriam.

2 a. Rubum videt inflammari
Moyses et admirari
Vadit, cur sic praeservari
Ardens possit lilium ;

2b. Sed est huius virgo glosa,
Quam non flamma vitiosa
Laesit, sed ut florens rosa
Gignens casta filium.

3 a. Siccam virgam Aaronis,
Madens vellus Gedeonis
Castae parturitionis
Modus glosat optime,

3 b. Cum tu, virgo singularis,
Inexperta thori maris
Caeli gratia roraris,
Parens Dei numine.

4 a. Docet Danielis visus,

Quis de monte sit abscisus
Et in statuam collisus
Lapis sine manibus ;

4 b. Domus Dei, mons paratus,
Super colles elevatus
Est e caelo impraegnatus
Uterus virgineus.

5 a. Porta haec Ezechielis,

Per quam clausam rex de caelis
Pertransivit, ut fidelis
Omnis credit populus.

5 b. Dato signo Ezechiae
Decem horis sol in die
Retrocessit, dum Mariae
Deum portat uterus.

6 a. Huius prece noster verus
Solvat suos rex Assuerus,
Hostem Aman dum severus
Fixit in patibulo.

6 b. Inimici nostrae gentis,
Holofernis furientis,
Caput abstulit serpentis
Pacem portans populo.

7 a. Cunctis pulchrior personis
Glosat carmen Salomonis,
Nam ornata caeli donis
Fulget in caelestibus.

7b. Coronatam stellis cole;
Mulier amicta sole
Cunctis praesidet cum prole,
Lunam calcans pedibus.

8 a. Sed, O virgo, nunc ausculta
Unde tibi ista multa ;
Per nos reos haec indulta
Tibi sunt a Domino;

8 b. Nam si nullus cecidisset,
Relevator non fuisset,
Sed nec virgo peperisset
Redemptorem saeculo.

9 a. Hinc non spernas peccatores,
Tuos, virgo, servitores,
Sine quibus nunquam fores
Tanto digna filio.

9b. Ergo nostra per peccata,
Dei mater, sic dotata,
Nobis semper advocata
Sis in hoc exsilio.