111. De Beata Maria V.

1 a. Iubilemus in hac die,

Quam baec virgini Mariae
Statuit familia.

1b. Nec est sine causa, quare
Debeamus iubilare
In hac die tertia.

2 a. Haec est prima feriarum,
In qua arbores terrarum
Crescunt sine semine ;

2b. Haec est prima feminarum,
Quae produxit mundo rarum
Fructum Dei numine.

3 a. In hac die sunt onustae
In instanti tunc arbustae
Maturis cum fructibus ;

3 b. Sic et baec in modum mirum
Femina concepit virum
Perfectum in omnibus.

4 a. In hac die congregavit
Aquas Deus et ornavit
Aridam cum floribus ;

4b. Haec est puteus aquarum,
Donans virgo lacrimarum
Potum peccatoribus.

5 a. Haec est hortus sigillatus,
Terra, de qua Christus natus,
Campi flos quaerentibus.

5 b. Fratres, huius terrae flores
Fructus dabunt et honores
Sibi servientibus.

6 a. Tunc sunt aquae congregatae,
Quando virgo pietate
Impletur et gratia ;

6 b. Nec est sine prophetia

Nomen virginis Maria:

Aquas vocat, maria.

7 a. O Maria, placa mare,
Propter nomen singulare
Iube obmutescere.

7 b. Trahit mundus, angit caro,
Daemon temptat sic, quod raro
Potest quis quiescere.

8 a. Ergo, mater, ne nos spernas,
Tuos fratres, dum hos cernas
Te colentes hodie ;

8 b. Quod si virgo nos refutas,
Quo transibunt fratres, putas?
Ad gehennam utique.

9 a. Hinc tu, mater Christi pia,

Nostra salus, o Maria,

In omni periculo,

9 b. Apud Christum, nostrum patrem,
Te monstrabis esse matrem
In mortis articulo.