112. De Beata Maria V.

1 a. Ave, virgo, mater Dei,

Quae es nostrae summa spei
Apud tuum filium ;

1b. Nos, qui sumus mortis rei,

Mereamur per te vehi

Ad caeli palatium.

2 a. Ora patrem, ora natum,
Ut informet nostrum statum
Ad virtutis meritum

2 b. Et praestet nobis ducatum,
Quo declinemus reatum
Et mortis interitum.

3 a. Tu es vere mediatrix,
Pia reconciliatrix
Inter nos et filium,

3 b. A quo, quod es condonatrix
Peccatorum et salvatrix,
Habes privilegium.

4 a. Pro salute peccatoris
Te creavit conditoris
Immensa clementia,

4 b. Ut, qui cadit in tot horis
Et corrumpit vas honoris,
Per te detur venia.

5 a. Accedamus ergo tuti
Nos, qui sumus involuti
Peccatorum sordibus,

5 b. Coram matre provoluti,
Intendat nostrae saluti,
Exoremus precibus.

6 a. Nihil negat ei natus,

Sed, quod petit, est paratus
Exhibere citius ;

6 b. Quantumcunque desperatus
Hanc si quaerit lacrimatus,
Hic erit propitius.

7 a. In exemplum nobis datur
Theophilus, qui probatur
Filius miseriae;

7 b. Qui cum matrem deprecatur
Et peccatum lamentatur,
Reformatur gratiae.

8 a. O Maria, caritatem,
Fidei sinceritatem
Et spei constantiam

8 b. Da et simul castitatem

Et virtutum largitatem

Et vitae munditiam,

9 a. Ut in his exercitati
Et per tuae roborati
Pietatis gratiam

9 b. A peccatis hic purgati
Transeamus praeparati
Ad aeternam patriam.

10 a. Ubi post hoc exsilium
Tuum cernamus filium
Facie ad faciem,

10 b. Qui ad invisibilium
Gaudiorum caelestium
Aspiramus requiem.