113. De Beata Maria V.

1 a. Salve, virgo consecrata,
Priusquam sis mundo data,
Intra matris uterum ;

1b. Dono sancta speciali,
Quod nec lapsu veniali
Peccares in posterum.

2a. Salve, Deum ventre gerens,
Quod humanum genus maerens
Per te sic laetificet;

2 b. O quam gaudens cecinisti,
Dum alvo Christum sensisti,
Canticum Magnificat!

3 a. Salve, lege volens regi,
Non astricta tamen legi
Purgandae puerperaej

3 b. Nam impurum nil sensisti,
Nec de viro concepisti,
Sed de Dei munere.

4 a. Salve, salutis alumna,
Salve, fidei columna,
In qua fides floruit,

4 b. Quando percusso pastore
Grex dispersus est timore
Et in fide corruit.

5 a. Salve, pia mater Dei,
Radix vitae, robur spei
Mortis in angustiis:

5 b. Per te quaeso consolari,

Da sincere meditari

De tuis deliciis.

6 a. Salve, sola spes salutis,
Nos in valle servitutis
Pressos tot miseriis

6 b. Iuva pia potestate,
Tabescentes egestate
Tuis reple copiis.

7 a. Hoc in fine mater ora,
Totis votis hoc explora,
Virginum piissima;

7 b. A me diligi dignare
Et me digne fac amare
Te, virgo dulcissima.

8 a. Zeli, quo cessent amores,
Tui me trahant odores
Et incendant gratiae.

8 b. Hoc teneri fac languore,
Hoc nutriri da dulcore
Ad obtentum gloriae.