120. De Beate Maria V.

1 a. Ave, plena gratia,
Genetrix egregia,
Sedes sancti spiritus ;

1b. Cuius fructus uteri
Dignatus est fieri
Patris unigenitus.

2 a. Ave, virgo virginum,
De qua salus hominum
Processit divinitus;

2 b. Cuius fructu panditur,
Qui per Evam clauditur,
Libertatis aditus.

3 a. Ave, quae per filium
Sacrum septenarium
Propinas humanitus ;

3 b. De cuius sacrario
Futurus oblatio

Sacerdos est editus.

4 a. Ave, porta gloriae,
Quae solem iustitiae
Mundo prodis caelitus;

4b. Soli Deo pervia,
Per quam de miseria
Fit ad vitam reditus.

5 a. Ave, cuius pretio
Omni plenus gaudio
Fit, cum adest, obitus.

5 b. Nos, o pia, confove
Et ad sortem redige
Nuptialis habitus.