123. Ad B. Mariam V.

1. Ave, mundi spes, Maria,
Ave mitis, ave pia,

Ave plena gratia,
In te Deus semper tecum,
Quaeso, esto semper mecum,

Cor amore satia.

2. Ave, Deo desponsata,
Reverenter salutata

Gabriele nuntio,
Verbum bonum et suave,
Nam ex Eva format Ave,

Sic fit mira junctio.

3. Mira quidem genitura,
Quando contra carnis jura

Natus est de virgine,
Deus homo, virgo mater,
Prolis cujus Deus pater

Non carnis origine.

4. Ave, coeli restauratrix,
Angelorum imperatrix,

Salvans omne saeculum,
Almi pneumatis serena
Charismatum cella plena,

Sanctitatis speculum.

5. Ave, mater, cujus fructus
Fuga fuit nostri luctus,

Vitae separatio ;
Eja, felix coeli porta,
Ex te nobis lux est orta,

Honor, exsultatio.

6. Ave, decus virginale,
Semper ave, gaude, vale
Summa ferens gaudia,
Natum, decus firmamenti,
Tu caliginosae menti
Desuper irradia.

7. Ave, nobilis factura,

Plus quam omnis creatura,
Coeli, terrae domina,

Mater summae pietatis,
Libro vitae cum beatis
Nostra scribe nomina.

8. Ave, templum majestatis,
Opus summae dignitatis,
Thronus regis gloriae,
O sacrarium virtutum,
Aditum fac nobis tutum
Tantae regis curiae.

9. Ave, fulgens maris stella,
Pulchra nobilis puella,

Omnibus amabilis,
Hester summo sponso cara,
Coeli civibus praeclara,

Cunctis venerabilis.

10. Ave, gemma claritatis,
Thymiama sanctitatis

Odoris salutiferi ;
Eja rutilans aurora,
Nobis gratiam irrora,

Signum salutiferi.

11. Ave, civitas illustris,
Qua artificis industris

Magnitudo patuit,
Princeps universitatis
Sedem suae majestatis

In hac urbe statuit.

12. Ave, thronus Salomonis,
Siccum vellus Gedeonis,

Area coelo rorida,
Porta tu Ezechielis,
Lacus clausus Danielis,

Virga Jesse florida.

13. Ave, paradisi hortus,
Arca Noe, vitae portus

Morte navigantibus ;
Eva laesit, tu sanasti,
Haec clausit, tu reserasti,

Aperi pulsantibus.

14. Ave, rosa caritatis,
Viola humilitatis,

Castitatis lilium ;
Prolem gignis deitatis
Sub sigillo castitatis,
Nobis placa filium.