COMMENTARIUS.

(a) Postquam Magister, etc. Postquam in prioribus cum Magistro exposuit extrinseca Baptismi, quantum ad formam, materiam, definitionem, institutionem, nunc proxime agit de suscipientibus Baptismum, qui sunt infantes et adulti, ad quos possit tripliciter comparari, vel ut recipiunt Sacramentum tantum ; vel secundo, ut recipiunt rem Sacramenti: vel tertio, ut recipiunt Sacramentum et rem Sacramenti simul. Suscipere Sacramentum tantum et non rem, competit ficto ; Sacramentum vero et rem Sacramenti suscipiunt infantes et adulti, qui sine fictione accedunt ; rem Sacramenti sine ipso Sacramento suscipiunt, qui baptizantur Baptismo flaminis, et sic decedunt sine Baptismo fluminis, cujus non est copia. Item, qui in sanguine baptizantur propter Christum, ut qui Martyrio ante Baptismum afficiuntur. Hic triplex modus suscipiendi Baptismum, patet ex locis Augustini et Hieronymi in littera citatis a Magistro.

Tractatum universum absolvit Doctor novem quaestionibus, prima pars ejus est de Baptismo infantium: continet tres quaestiones, prima: An sint baptizandi ? secunda : An recipiant effectum Baptismi ? tertia : An in utero materno possint baptizari ? Secunda pars est de adulto, et continet quartam et quintam quaestionem : Utrum non consentiens recipiat effectum Baptismi f Utrum fictus recipiat eumdem f Tertia pars est de utrisque, ad quam spectat quaestio sexta et septima : Utrum justificati teneantur ad Baptismum ? Utrum omnes baptizati aequaliter recipiant effectum Baptismi f Quarta pars continet octavam et nonam: prima est de parvulo exposito; secunda parvulis Judaeorum et infidelium.