122. De Beata Maria V.

1 a. Ad te currunt, o Maria,
Peccatores, caeli via,
Portus et umbraculum.

1b. Peccatorum miserere,
Mater, salva et tuere
Christianum populum.

2 a. Benedicta mater Dei,
In te sperant omnes rei,
Salus et refugium.

2 b. Ne mergamur in profundum,
Roga regem sempiternum,
Creatorem omnium.

3 a. Ad te clamat omnis mundus,
Omnis homo furibundus,
Fac, succurras homini.

3 b. Imperatrix et regina,
Nos conserves a ruina,
Virgo, mater Domini.

4 a. Commendamus nos hac die
Tibi dulci, tibi piae,
[Tibi] virgini, Mariae,
Salvatrici saeculi.

4 b, Te donante, maris stella,
Sancta parens et puella,
Paradisi tua mella
Tui gustent servuli.

5 a. O Maria, salus nostra,
Iesu Christo tu demonstra
Tui pectoris ubera,

5 b. Tu, quae salvas totum mundum,
Ne mergamur in profundum,
Virgo salutifera.

6 a. Venter tuus est beatus,
In quo Deus incarnatus,
De supernis inclinatus ;
Et sic homo sublimatus,

Qui fuerat perditus ;
Et haec per te, genetricem,
Peccatorum salvatricem,

Templum sancti spiritus.

6b. Speciosa margarita,

Miserorum spes et vita,
Castitate redimita,
Nulli factum fuit ita,

Virginale lilium ;
Specialis, speciosa,
Generalis, generosa,

Hominis consilium.

7. Gaude, sancta; gaude pia;
Gaude, dulcis o Maria,
Pietatis gaudium.