117. In Resurrectione Domini.

1. Phoebus ecclipsi tumuli
Restringens umbram saeculi,
Pridem neci subiectus.

Refulsit surgens hodie,
Per quem perennis gloriae
Spe homo est refectus.

R Alleluia laetitiae

Christo, soli iustitiae!

2. De morte surgens grabato,
Qui hominem in sabbato,
Totum mundum salvavit ;

Mortem morte propterea
Devicit et tartarea
Claustra praecipitavit.

R Alleluia laetitiae
Christo, soli iustitiae !

3. Captivos, quos dilexerat,
De limbo patres vexerat
Ad agmina polorum ;

Plutonis posse destruit
Et vitae sedem construit
Credentum populorum.

R Alleluia laetitiae
Christo, soli iustitiae !

4. O Iesu, qui conglutinas
Et in statera trutinas
Totius orbis molem,

Laus, honor cum victoria
Sit tibi, virtus, gloria,
Qui manes ante solem.

R Alleluia laetitiae
Christo, soli iustitiae !

5. In hoc paschali gaudio
Benedicamus Domino
Discantu cum tenore ;

Laudetur sancta trinitas,
Deo dicamus gratias
Mente simul et ore.

R Alleluia laetitiae

Christo, soli iustitiae!