129. De Beata Maria V.

1. O Maria, mater Dei,
Miserere, precor, mei
Atque pro me roga Deum,
Ut absolvat istum reum.

1. Ecce, tibi me commendo
Meque tibi servum trado,
Ut domina me suscipe
Et clementer me respice.

3. Respice huc, o Maria,
Dei mater et filia,
Et visita hunc miserum,
Oppressum mole scelerum.

4. Serva tibi commendatum,
Tibi servire paratum,
Tuae donum pietatis
Me absolvat a peccatis.

5. O Maria piissima,
Omni laude dignissima,
Fac me digne te laudare,
Venerari et amare.

6. O domina dominarum,
O regina reginarum,
Propter tuam pietatem
Tolle meam paupertatem.

7. Pauper enim et egenus,
A Deo sum alienus,
Adversum me irritavi
Deum, in quem tam peccavi.

8. Deum mihi pacifica,
Dei mater et amica,
Hoc te posse impetrare
Nullus debet dubitare.

9. O praeclara stella maris,
Quae cum Deo gloriaris,
Fac me ad portum venire,
Nunquam sinas me perire.

10. O Maria, flos virginum,
Ora pro me ad Dominum,
Ut ad caeli palatia
Perveniam te praevia.

11. In qua miser nequissimus
Possim esse vel ultimus,
Laudans Deum per omnia
Saeculorom saecula.