125. De Beata Maria V.

1. Gesta virginis matris

christianitas omnis recolat,

2 a. Quae nata sterili est

parente in salutem

cunctis populis.

2 b. Fert virgini angelus

Ave nuntiaturque

conceptus Dei.

3 a. Qua fidem praestante

immensus

suo ventre clauditur.

3 b. At illa conscendens

montana

visitat Elisabeth.

4 a. Tandem gravida Bethlehem

properat, parvulum

fundit, signaculum

perstat pudoris.

4b. Virginalia ubera

praebet infantulo,

brachiis stringit, dat

crebra oscula.

5 a. Hinc circumcisum

post regum latriam

tulit in templum

legis iuxta ritum ;

suscipit Simeon parvulum,

exsultat magno gaudio.

5b. Vadit Aegyptani

tenera puella,

gestat tenellum

in ulnis filium ;

post duodenum amissum

magno quaerit cum lamento.

6 a. Quem reperiens adloquitur

quam suaviter:

"Fili, quid fecisti nobis sic Et accipit symbolum:

Quid, inquit, quaeritis

propria patris

exsequentem ?

6 b. Redeuntibus in Nazareth

ipse iungitur

et subditur atque virginis

matris ope pascitur,

ac versa vice

amore eius

ipsa nutritur.

7 a. Post in nuptiis aderat

virgo cum filio,

qua suggerente

fecit vinum ex lympha.

7 b. Sequitur tandem filium

docentem populum

atque curantem

omnes male habentes.

8 a. Ad quem mulier de turba

exclamando

ventrem virginis,

qui ipsum tulit,

et ubera, quae ipsum

lactaverunt, beatificat ;

8 b. Ad quam salvator hoc verbum

rarificans:

Quinimo , ait,

beati omnes,

qui verbum Dei audiunt

atque custodiunt illud .

9 a. Captum audiens

ligatumque videns,

ab impiis sputis illitum

et palmis caesum,

vultu velatum

ac iniquorum

repletum ludibrio,

9 b. Flagris attritum

ac veste illusum

atque damnatum, portantem

crucem sequitur

maesta, cingit nudatum

velo sui

benedicti capitis.

10a. Astat erecto patibulo

cum dilecto discipulo

morienti in eo

suo nato.

10 b. Qui matri ait desolatae:

" Mulier, en, natus tuus ;

Iohanni autem: "Ecce,

mater tua .

11a. Hinc nati corpus

in gremio confovens

virginali

et unctum murra

tradidit sepulturae.

11b. Quem resurgentem

a mortuis conspexit

laetabunda,

scandentem caelos

vidit mox secutura.

12 a. Pneuma divinum

de caelis advenit

inundans Christi alumnos ;

12 b. Sed prae his cunctis

visitat ac replet

ac solatur Iesu matrem.

13 a. Iam advenerat

tempus, quod praeviderat

sapientia

Dei patris, ut matrem

virginem locaret

in caelis, anima

corporeque beatam ;

13 b. Gaudent angeli,

lactantur archangeli,

simul tota

beatorum contio

exsultat iubilans,

regina caeli cum

levatur super astra.

14. Ubi nos sanguine nati

redemptos

commendat creatori

et redemptori.