QUAESTIO VIII.

Utrum substantia materialis per aliud positivum pertinens ad genus substantiae sit individua ?

aegid. quodl. 2. q. 7. Goffr. quodl. 6. q. 16. Doctores citati quaest, praeced. et alii apud Suar. Het. disp. 5. sectione 6. Scot. in Oxon. hic 2. dist. 3. quast. 6.

Quod non, quia si sic, illud cum quidditate faceret compositionem in individuo, sicut actus et potentia ; hoc autem est falsum ; tum quia in Angelis non est talis compositio ; tum quia illud positivum vel esset materia vel forma, vel compositum, et tunc individuum vel haberet duas materias intrinsece, vel duas formas, vel duas substantias compositas, quia quidditatem speciei, et illud positivum additum.

Item, si sit singulare, est per se unum ; igitur per se intelligibile, quod videtur contra Aristotelem, 2. de Anima, text. 60. et 3. de Anima text. 27. 7. Metaphysic. text. 37. 1. Physicorum, text. 55.

Item, si sic, posset esse demonstratio de individuis, quia quod per se est intelligibile, de eo potest passio per se sciri. Sed hoc est contra Philosophum. 7. Metaph. cap. de partibus definitionis : Definitio est solius quidditatis, quae tantum est species, istud individuum non includit solum quidditatem.

Item, ab isto positivo superaddito posset accipi differentia, a quidditate genus, et tunc posset individuum proprie definiri.

Oppositum : Omne per se inferius includit aliquid contrahens superius, quod est ejusdem generis ; igitur individuum per se includit quidditatem, et aliquid ejusdem generis positivum, vel contrahens quidditatem.