128. Ad B. Mariam V.

1. Ave, cujus ventris fructus
Morbos, pestes, iras, luctus

Trivit trito funere ;
Ave bona, ave bonum,
Per quod Deus ultionum
Nobis egit libere.

2. Ave sola pollens tribus,
Si non quantis, dico quibus,

Fronde, flore, germine:
Frons obumbrat, flos demulcet
Germen pascit, ut conculcet,

Quod putet in homine.

3. Ave, parens sine pare,
Pariendo gloriare,

Partu parta gloria ;
Ave, portus, ave, porta,
Hunc portasti, quo absorpta
Mors est in victoria.

4. Virgo, vitis, clavis, ave,
Per quam mortis fracta clave

Vita mortem abolet ;
Aquis motis in piscina
Solve mentem a sentina,

Quae sentinam redolet.

5. Ave, pulchra et decora,
Cum te colam, me decora,

Ne culpa dedecoret ;
Instat enim mihi reo
Hostis mihi tamquam leo,
Qui quaerit, quem devoret.

6. Ave, clemens et benigna,
Quae pudoris tenens signa

Facta es puerpera,
Cujus facti sacramentum
Omne pellit argumentum,

Nisi fallat litera.

7. Stilla favi, stillans ave,
Fove reum, reo fave,

Omni favo dulcior,
Dulcis rosa super favum,
Cladis meae rumpe clavum,

Quo clavatus crucior.

8. Praedotata de sublimi
Super primas, ave, primi

Mater et novissimi ;
Ave, quia tu fovisti
Tuo sinu membra Christi,

Cara praccarissimi.

9. Ave semel, ave rursus,
Ave, per quam noster cursus

Promeretur bravium ;
Ave, quia quod faex Evae
Longum fecit, nobis breve

Reddidisti stadium.

10. Sola solis fulgens more,
Ave, cujus in odore

Unguentorum currimus,
Generalis generosa,
Ave, quam in mortis hora
Reis piam novimus.

11. Ave, caput nostrae spei,
Spes colenda, mater Dei,

Nobile triclinium ;
Ave, coelo fulgens luua,
Sed defectu carens una

Portans pondus omnium.

12. Hoc audemus de te fari,
Quod, si sancte majorari

Possit sancta trinitas,
Quarta tibi pars daretur,
Quod idcirco prohibetur
Ne fiat quaternitas.

13. Pia mater Jesu, ave,
Quam eversa mari nave
Nautae timor invocat;
Ave semel et secundo,
Cujus virtus in profundo
Mersos sursum revocat.

14. Super mites ave mitis,
Ave palmes, ave vitis,

Palmes vitem generans ;
Hac de vite palmes venit,
Palmes vitem hanc praevenit,
Nil tamen praeposterans.

15. Ave, mundi necans necem,
Cujus totum est, ut precem

Fundas pro peccantibus ;
Ave, cujus favet voto
Coeli turba nisu toto,

Voluntate, viribus.

16. Ave, clemens o Maria,
Mente Rachel, actu Lia,

Hoc modo non aliter:
Rachel, quia contemplaris,
Lia, quia fecundans,

Tamen dissimiliter.

17. O Maria, matrum palma,
Mater dulcis, mater alma,

Cujus fisus nomine
Confidenter cantat reus:
Miserere mei Deus,

Parce mihi, Domine,

18. Cum in coelis sis assumpta,
Ave, tamen semper prompte

Infirmis succurrere;
Si rogeris puro corde,
Rogans mundus fit a sorde,

Verbum complens opere.

19. Quid centenis utens linguis
Dicam, nisi quod exstinguis

Virgo luxus hominum ;
Ave multum, ave plene,
Quae doloris nostri poenae

Posuisti terminum.

20. Hoc silebo, hoc loquarne,
Quod de carne sine carne

In te caro floruit?
Unde semper et non raro
Sit beata tua caro,

Qua nostra refloruit.

21. Ave, virgo jubilea,
Qua solvuntur reus, rea

Et laxatur debitum,
Ave rursus, et solutos
Fac a mundi faece tutos,
Vitam dans post obitum.

22. Si quid habent boni boni,
Fit per bonum tui doni,

Ave, donans jugiter,
Non nobis te nostris bonis,
Sed revera tibi omnis

Laus in fine canitur.

23. Ave per quam summum ducem,
Immo suam vidit lucem

Populus in tenebris ;
Ut viderent lucem isti,
Mortis somnum repulisti

Ab eorum palpebris.

24. Piis bona, pia bonis
Praemonstrata Gedeonis

Madidato vellere;
Ave, cujus ditioni
Subdunt sua seque boni

Mente, verbis, opere.

25. Loquens mane, loquens sero
Vere minus erit vero,

Quidquid de te dixero ;
Sed silere cum sit grave,
De te tibi semper ave

Dicam, quoad vixero.

26. Ave, cujus dulce nomen
Gratus odor est et omen,

Hilaris memoria ;
Ave, virga, quam de Jesse
Egressuram nobis esse

Sonuit historia.

27. Fertur virga floruisse,
Florens statim fronduisse,

Frondens dans amygdalum ;
Valet aegris fructus ille,
Tuus solvit non a mille,
Sed a cunctis scandalum.

28. Virga silex bis percussus
Aquas fundit quasi jussus,

Quibus gregem satiat ;
Sic Maria dura quidem
Mundi mollit, ejus fidem
Format, nutrit, ampliat.

29. Si de cruce loquar Christi,
Ave, quia tu fuisti

Caput hujus operis;
Nunquam enim pateretur,
Nisi de te nasceretur
Descendens a superis.

30. Ave, quia sicut leo

Caudam trahens delet eo,

Quo vadit, vestigium,
Sic et tuum intrans alvum
Deus exit servans salvum

Virginale gremium.

81. Ave, David illa turris,
Quae sustentas et succurris

Laesis hostis vulnere;
Ave, quies et asylum
Quae non solum sinis pilum
Perire de capite.

32. In Judaea tantum notus
Olim Deus per te totus

Noscitur totaliter ;
Ave, mater castitatis,
Cui prae cunctis favet castis
Deus specialiter.

33. Si quid boni praedicatur
De quo bono, tibi datur

Salva nati gratia ;
Ave, cujus per obtentum
Aes mutatur in argentum
Et in aurum scoria.

34. Mundus mendis inundatus
Per te mundam fit mundatus

Nec tot immunditiae
Mundo erant in errores,
Quot mundati tibi rores
Insunt et munditiae.

35. Quot arenas habet mare,
Tot debemus Ave dare

Tibi, plena gratia ;
Nec arenae tot sunt mari,
Quot sunt, quibus commendari

Debet tua gloria.

36. Ave, solis illa vestis
Qua vestire solem gestis,

Vestis, quam nil perforat;
Solem vestis carne munda,
Carnem tuam sol jucunda

Deitate roborat.

37. Pro his, pro tot et pro tantis,
Ave, virgo, vigor stantis,

Lapsi resurectio;
Omnis enim stans stat tibi,
Si quis cadit, ades ibi,

Ut sis relevatio.

38. Et quid dicam de te, mater,
Ave, semel, bis, ter, quater,

Ave, plena gratia ;
Ave, sanctum thymiama,
Cujus solvit sola fama

Natos a miseria.

39. Ave, cujus verbis favit,
Aquam Deus dum mutavit,

Dum vinum deficeret ;
Istud tibi plus adscribo,
Sine qua potu nec cibo

Convivas reficeret.

40. Rubus ardens incombustus,
Quod cor, auris, lumen, gustus

Non gustarunt, docuit ;
Quid? te, virgo, parituram
Et post partum permansuram

Virginem, ut decuit,

41. Quod Aegyptus spoliatur,
Quod in mari suffocatur,

Turba Pharaonica,
Cum hoc donum per te datur,
Ave, tibi duplicatur
Et cum hymnis cantica.

42. Ave, quies ad quietem,
In qua nostrum Moysetem

Quievisse novimus ;
In quiete quies tota,
Quies motu nullo mota,
Quies, qua quievimus.

43. Omni grata, nulli gravis,
Speciosa et suavis

Tuis in deliciis,
Oris nostri sumens Ave
Nos defende mortis a vae,

Lamento, miseriis.