132.

1. Dies ista

dies pretiosa,
Dies nati

regis gloriosa,
Est de David

stirpe generosa
Christus natus,

proles speciosa.
Regem regum * * * *

virgo plena gratia,
Suum parit patrem, cujus

mater est et filia ;
Nascitur ex femina,

qui creavit omnia ;
Novum festum, novum opus,

nova sunt solemnia.

2. Dei testis

homo fit pro mundo,
Ut mundaret

mundum ab immundo,
Quem ab hoste

captum furibundo,
Liberavit

plausu laetabundo.
Liberavit homo factus

coeli factor hominem,
Quem creavit et formavit

suum ad imaginem,
Cui portam reseravit

per Mariam virginem.

3. Exsulatus

a coelesti domo,
Cujus domus

fraglat cinnamomo,
Immortalis

fit mortalis homo
Manducato

noxiali pomo.
Manducavit homo pomum,

et in mortem corruit,
Cujus culpam ut deleret,

Deus nasci voluit
Et, ut servum liberaret,

servi formam induit,
Nec assumpta verbi forma

deitatem minuit.

4. Eva quidem

nos mortificavit,
Sed Maria

nos vivificavit,
Quae coelorum

regem generavit,
Cujus ortus

nos purificavit.
Et a jugo servitutis

simul et miseriae
Liberavit sacramento

legis necessariae,
Cujus ortum recolentes

gaudeamus hodie,
Exsultantes et cantantes

canticum laetitiae.