132. De Beata Maria V.

1. Virgo, mater melliflua,
Te deprecantes adiuva,
Surge, virgo puerpera,
Hostis repelle machinas.
Ave, Maria.

3. Surge, materna pietas,
Tua nos reple gratia,
Quae hostium insidias
Effuget et nos muniat
Per te, Maria.

2. Gregis caulas ne deseras.
Lupum mordacem conteras
Et hostiles versutias
Procul a nobis facias.
Ave Maria.

4. Surge, virgo fructifera,
Genetrix integerrima,
Confer nobis iuvamina
Auferens cuncta noxia,
Pia Maria.

5. Quae baiulasti filium,
Vitae et mortis dominum,
Fuga catervas daemonum,
Donans nobis remedium,
Virgo Maria.

6. O consolatrix domina,
Quae omnibus es omnia,
Delicti solve vincula,
Quae me torquent tam gravia,
Mater Maria.

7. Heu, quam nefanda crimina
Et omni labe sordida,
Plenus sum immunditiis
Et foetore libidinis;
Parce, Maria.

8. Heu, dirae mortis sarcina,
Quae ut fur omnes enecas!
Quo mea ibit anima,
Quae tot complevit vitia?
Audi, Maria.

9. Heu, quam fuerunt dulcia
Plena foetore crimina I
Si comparantur omnia,
Quis est, qui me eripiat?
Parce, Maria.

10. Parce iam culpis, domina,
Parce, mater piissima,
Rumpe Satanae retia,
Nostras dirige semitas,
Virgo Maria.

11. Funde preces pro miseris,
Colentibus te subveni,
Ut puri a contagiis
Poli fruamur gaudiis
Per te, Maria.

12 Mater supremi iudicis,
Virgo, misellis subveni.
Ut per te cum caelicolis
Personemus hymnidicis
Aula, Maria.

13. Tu igitur ad sidera
Nos ad te sursum eleva,
Ut inter sacras epulas
Tecum simus in gloria,
Sancta Maria.

14. Hoc nobis trina unitas
Et simplex donet trinitas,
Ut non sit nobis sarcina
Mortis finis, sed gloria.
Ave, Maria.