131. In Dedicatione Ecclesiae.

1. Sacratum hoc templum Dei,
Altaris renovatio,
Nos recurrentes annuas
Laudes Deo referimus.

2. Altare magnum hoc Dei
Sacratum est in hac die,
Cujus honore sedulo
Omnes curvamus genua.

3. Precantes autem Dominum,
Qui solus invisibilis,
Ut nos semper in hoc loco
Sanctificari jubeat.

4. Vota solventes hic Deo
Sanctisque ejus omnibus,
Quorum sacrae reliquiae
Templum ornarunt hoc Dei.

5. Omnis, qui hic ingreditur,
Sanctificatus exeat,
Semper orando Dominum
Purificatus maneat.

6. Caerimoniarum hostias
Ad hoc altare jugiter
Nos offerentes pariter
Devotis semper mentibus.

7. Sanctificet nos Dominus
In hoc templo sancto suo,
In quo et nos solemniter
Sacrum munus offerimus.

8. Deum, fratres carissimi,
Et Christum ejus filium
Simul cum sancto spiritu
Hvmnis laudemus jugiter.

9. Deo patri sit gloria.