134. Oratio ad laudem beatae Mariae, matris Domini.

1. Salve, regina omnium,
Virgo mater, post filium,
Salve caelestis ianua,
Peccatoribus patula.

2. Salve, tu Dei genetrix,
Virgo florens et fertilis,
Tuo processit utero
Tamquam sponsus de thalamo,

3. Qui nos venit redimere,
Mundum dignatus visere,
Ne sit mihi damnatio,
Piissima redemptio.

4. Ecce, quantum horribilis
Castis assisto oculis,
Tuis primum, post omnium
Felicibus caelestium,

5. Quorum mea luxuria
Mordetur pudicitia;
Nec solum istud vitium
Mihi infert iudicium,

6. Sed quot dicuntur nomina,
Tot mihi insunt vitia,
Quorum miser dominio
Assiduus inservio.

7. Et quia moles criminum
Me malis facit miserum,
Ad te solam confugio,
Tuum solamen quaerito.

8. Pande mihi piissimum
Pietatis sacrarium,
Pateant aures beatae
Meae vocis angustiae.

9. Appella pro me filium
Dei tuique unicum,
Ut sit mihi remissio,
Quod te prae omnibus quaero.

10. Audi voces miseriae,

Quas non possum exsolvere,
Nisi tibi, sanctissima,
Virgo post partum unica.

11. Ne tibi sit offensio
Tot scelerum confessio,
Nam se calcari pedibus
Meis nollet diutius,

12. Si me terra cognosceret,
Se supter me dehisceret,
Sum enim bonis omnibus
Malis meis contrarius.

13. Quod diligis, non diligo,
Virginitatem fugio,
Perversus, mendax, invidus,
Illicitorum cupidus,

14. Ira frendens et odio
Et semper studens otio.
O quam lugere debeo,
Tot vitiis quod servio!

15. Nam non urbis excidium,
Sed animae periculum;
Imago Dei deperit,
Anima caelo decidit.

16. Quid dicam ante iudicem,
Caelis, terris terribilem,
Dum statuet iudicium
Et iudicabit saeculum?

17. Vix iustus tunc salvabitur
Et impius damnabitur,
Ibi parebunt omnia
A saeculis abscondita.

18. Unusquisque pro merito
Recipiet a Domino,
Boni bonorum gaudia,
Mali malorum praemia.

19. Locus mei similibus

Cum igne, gelu, vermibus,
Infelices, qui talia
Passuri sunt supplicia,

20. Ego tamen prae omnibus
His horum ero socius.
Heu, heu, mihi misero !
Cur processi ex utero,

21. Cur lactatus uberibus,
Cur nutritus remissius,
Ut infernales pascerem
Et caeli regna perderem?

22. Mors mea nimis misera;
Lugete mecum, omnia,
Dole, caelum, superius,
Terra, nec non inferius,

23. Immo Christum exposcite
Et pro me intercedite.
Quonam miser confugiam,
Quem advocatum repetam?

24. Sum peccator prae omnibus,
Idcirco nec sublimius ;
Expedit me transcurrere
Et adiutorem quaerere.

25. Tu, sancta Dei genetrix,
Hac es in re possibilis,
Te spem meam constituo,
Tibi me servum offero.

26. Fide mea me suscipe,
Nato tuo restitue,
Mea infelix anima
Ne sit in fine perdita.

27. Praesta mihi subsidium,
Dum hoc suspiro saeculum;
Et cum recedet spiritus,
Adesto castis precibus.

28. Nam te orante, domina,
Sanctorum surgent milia,
Si tu sola silueris,
Vox nulla erit aliis.

29. Nam es regina caelitum,
Rectrix, redemptrix omnium,
Noli silere, domina,
Esto mihi propitia.

30. Non vult enim me perdere,
Qui me redemit sanguine,
Ille, regina, unicum
Quem genuisti filium.

81. Fac festum eius angelis,
Fac nunc vacare gaudiis,
Mea enim conversio
Fiet eis laetatio.

32. Et conversum a vitiis
Custodi, Dei genetrix,
Me cunctis locis protege,
In viam pacis dirige.

33. Stantem, sedentem corrige,
In cunctis factis dirige,
Manum sacratam porrige
Labentem nec non erige.

34. Marina stella, obsecro,
Serva me maris taedio,
Aufer a me periculum,
Ut vales et scis indigum.

35. Vales enim prae omnibus,
Quos praecellis virtutibus.
Tu angelorum domina
Et prophetarum gloria,

36. Apostolorum, martyrum,
Confessorum et virginum
Nec non sanctorum omnium,
Ut est ordo caelestium,

37. Quorum iuncta consortio
Ora pro me miserrimo,
Solve mei miseriam
Et impende clementiam.

38. Ab hoedis tristem eripe
Et ovibus intersere,
Fac me gaudere floridis
Paradisi deliciis,

39. Ut Christi vocem audiam,
Per quam regnum possideam,
Per te, regina omnium,
Virginitatis speculum.

40. Audi, Christe piissime,
Patris matrisque unice,
Illius absque termino,
Istius in hoc saeculo,

41. Audi matrem piissimam,
Quam sic fecisti inclitam.
Haec est, cuius visceribus
Dulcis prodisti dulcibus.

42. Dulcedinem inveniam,

Quam in te spero unicam.
Tu es enim suavitas
Et singularis pietas.

43. Adiuro te, rex, iterum
Per hoc nomen mirificum,
Cunctis rebus terribile,
Cunctis saeclis mirabile,

44. Ut sit mihi proficuum
Et avertat periculum,
Cumque micabit terminus
Omnium reruni caelitus,

45. Eius mihi confessio
Sit scelerum remissio,
Et adipiscar veniam
Evadendo sententiam.

46. Nec imputes stultitiae,
Rex Christe clementissime,
Quod nominare audeo,
Exponere quod nequeo.

47. Legem enim necessitas
Neque habet adversitas.
Vale, redemptor omnium.
Generale dominium,

48. Vale, beata trinitas
Et triplicata unitas,
Vale per omne saeculum
Et dele massam scelerum.

49. Salve, tu Dei genetrix,
Virgo inaestimabilis,
Salve, caelestis pietas
Et pietatis caritas,
Sis servi tui, deprecor,
Immeriti non immemor.