135. De Beata Maria V.

1. Maria, virgo regia.
Sponsa regis et filia,
Quam Dei sapientia
Elegit ante omnia.

2. O benedicta femina,
Universorum domina,
Summi regis arcaria
Et eius secretaria,

3. Dei reclinatorium
Et eius consistorium,
Armarium paracliti,
Sacrarium altissimi.

4. Domus regis eburnea,
Eius interna camera,
Quam dedicavit caelitus
Missus ab eo spiritus,

5. Maria, fons iustitiae
Et vena indulgentiae,
Casti pudoris cumulus
Ac pietatis titulus.

6. Caritatis signaculum,
Totius boni speculum,
Aurora veri luminis,
Arca divini seminis.

7. Columba placidissima,
Turtur, avis castissima,
Cui faber Deus aureas
Praeparavit marenulas,

8. O margarita candida,
O stella mundi splendida,
Vera eius pacifera,
Facta caeli clavigera,

9. Tu paradisi porta es,
Ad caelum scala facta es,
Per quam Deus ad homines,
Ad Deum scandunt homines.

10. In domo Dei supera
Oliva es fructifera,
Tu cella olearia,
Repleta Dei gratia,

11. Aromatum areola,
Ab hortulano consita,
Tu in horto arbuscula
Salubris, aromatica.

12. Aeterni sponsa principis,
Tu affluis deliciis,
Decora et spectabilis,
Tota desiderabilis.

13. In Salomonis ferculo
Tu es lignum de Libano,
Columna es marmorea
De base sargens aurea.

14. Turris David fortissima,
Quae habet propugnacula,
Contra Damascum respicis,
Cives regis ac protegis.

15. Tu frigus idolatriae
Et gelu ignorantiae,
Tu Aquilonem deicis,
Cum regem Austri concipis.

16. Sublimis es puerpera,
Virga Iesse florigera,
Flos ille tuus filius,
Ortus ex tuis ilibus.

17. Cui caeli servit solium,
Tu genuisti filium,
Creatura principium,
Deum, regem mancipium.

18. Mira regis humilitas,
Miranda tua sanctitas!
Qui tua suxit ubera,
Caelo locavit sidera.

19. Lucis solaris artifex

Sub sole homo factus est
Et, qui creavit omnia,
Creatur inter omnia.

20. Qui erat sine tempore,
Humanatur in tempore,
Et verbum invisibile
Per carnem fit visibile.

21. Ut sexus omnis gaudeat,
Ut Dei laudes ambiat,
Puer ille, qui nascitur,
Femina, unde nascitur.

22. Laetetur ergo femina,
Sua solvuntur crimina;
Quod in Eva peccatum est,
In Maria donatum est.

23. Virgo quae caret macula,
Tersit eius piacula,
Mater per suum filium
Evae tulit opprobrium.

24. Quam benedicta virgo es
Inter omnes mulieres,
Quae mediatrix facta es
Inter Deum et homines !

25. Quam capax tuus uterus,
Quam magnus urbis ambitus,
Quo Deus et ecclesia
Laeti celebrant nuptias!

26. Quam laeta haec coniugia
Et quanta plena gratia,
Ubi sponsus, qui filius,
Pater et ipse dominus I

27. Qui sibi matrem eligit,
Sponsam eandem perficit,
Ex eius ortus semine
Suo lustravit sanguine.

28. Tanti pompam mysterii
Laeti celebrant angeli,
Dum Deo canunt gloriam
Terrisque pacem nuntiant.

29. Et tu, mater sanctissima,
Virgo gloriosissima,
Dum sedes ad praesaepia,
Cantas epithalamia.

30. In iubilo psalterii
Assumpta tuba ductili
Dulci cantu et supplici
Vagitus tenes pueri.

31. Quam laeta tympanistria,
Quae sua canit gaudia,
Inter sua convivia
Sancta discurrit saltria!

32. Laeta stupet mysterio,
Quo mater nubit filio,
Ubi ancilla domino
Et humilis altissimo.

33. Quicunque fidei brachiis
Dei cultum amplecteris,
Tantam pensa potentiam
Et admirare gratiam.

34. Tu non eras, creavit te,
Tu lapsus es, erexit te,
Ut dives caelo fieres,
In terra pauper factus est.

35. Terra transit in hominem,
Homo in Dei subolem,
Ut homo Deus fieret,
Deus homo effectus est.

36. Assumens carnis pallium
Carnis extinxit vitium,
Secus decursus fluminum
Lignum fuit firmissimum.

37. Exsultat fortis ut gigas
Mundi percurrens semitas,
Suo exemplo currere
Et mundum docens vincere.

38. In summi patris vinea
Vitis fuit plenissima ;
ludas per avaritiam
Distraxit hanc vindemiam.

39. Iudaeus prelum posuit,
Sanguis et unda profluit ;
Inde te, homo, abluit
Et paradiso reddidit.

40. Botrus ille dulcissimus
In vecte crucifigitur,
Incredulus confunditur,
Sed christianus pascitur.

41. Quot lacrimarum rivulos
Tuos lucentes oculos
Dicam fudisse, domina,
In cordeque suspiria,

42. Cum tuum, mater, unicum
Pati vides suspendium,
Dira transpunctum lancea,
Corona saeptum spinea,

43. Agnum de tuo semine
Rubro vernante flumine
Inter manus carnificum
Torqueri hominem-deum!

44. Quot edidisti gemitus,
Quando tibi vicarius
Pro magistro discipulus,
Pro rege datur famulus I

45. Doloris acutissimo
Transverberata gladio
In passione filii,
Mater, martyr efficeris.

46. Sciebas quidem, domina,
Afflata Dei gratia,
Quia de morte filii
Salus manaret homini,

47. Quod mortis abolitio,
Quod vitae reparatio
De hoc crucis mysterio
Exiret omni populo,

48. Quod agnus obit innocens,
Ut mortis vincat principem,
Ut mortem mors exterminet,
De morte vita pullulet.

49. Sciebas, quod in filio
Mundi esset redemptio,
Quod de hoste victoria,
De passione gloria.

50. Maternus tamen animus
Pios effundit gemitus,
Et insitiva caritas
Dulces extorquet lacrimas.

51. Redemptionem hominum
Plenum habebas gaudium,
Sed tua carne genitum
Prosequeris per gemitum.

52. Sed et salvantis gratiam
Ac pietatis unicam
Dum attendens circumspicis
Et admirans amplecteris,

53. De pietatis opere
Egrediuntur lacrimae,
Pro salvatrice gratia
Pia mentis angustia.

54. Hunc, mater, mihi filium
Praesta, quaeso, propitium,
Fac, mihi manum porrigat,
Me male lapsum erigat.

55. Ego peccator sordidus
Lepraque turpi tabidus,
Omni leproso turpior,
Omni nequam miserior,

56. Cururri per nefaria
Iniquitatis opera,
Non declinavi omnia
Pollutionis genera.

57. Quod culpaeest,quod criminis,
Nunquam implere destiti,
Omni reatu sordui
Et omni sorde putui.

58. In torpore socordiae,
In foetore malitiae
Ut iumentum in stercore
Longo cubavi tempore.

59. Iam pro Datura vitium,
Iam versum est in habitum,
Iam rationis oculus
Caligine confunditur.

60. Sed ora, precor, filium,
Ut per lucis collirium
Malam tollat albuginem
Et mentis hebetudinem.

61. Per spiritalem faculam
Solvat peccati nebulam,
Ad sequendam iustitiam
Lucem refundat perditam.

62. Det aspernari noxia
Et amplecti utilia,
In me confringat omnia
Lutulenta negotia.

63. Sic me transire faciat
Huius mundi tendiculas,
Ne me captum retineat
Saecularis illecebra.

64. Sit mihi ductor, sit via,
Qua revisatur patria,
In qua pater et filius
Regnant cum sancto spiritu.