CAPUT XXXI.

De quercu et proprietatibus ejus.

Quercus est arbor magna valde et alta et lata in ramis, profundata in radicibus multis magnis, asperi corticis quando antiquatur, sed lenem habet in juventute, latitudinem et magnitudinem magnam habet in ramis. Folium autem spissum et latum et durum, quando convaluit, et est totum circumpositum triangulis, quorum bases sunt super folium, et angulus in exteriori, et multum adhaeret ei folium, sed tamen fluit : exsiccatum enim adhuc frequenter adhaeret aliquando : est autem lignum ejus crescens ex tunicis rectis, et est rectorum pororum, et divisibile ad lineam, et dolabile, bene tenens figuras magnarum incisionum : sed in hoc vincitur a buxo. In exteriori tunica habet albedinem, et in interioribus declinat ad ruborem : in aqua positum primum natat, et tandem mergitur propter ejus terrestreitatem, et tunc denigratur : et hujus causa jam ex antehabitis scitur.

Fructus autem ejus glans vocatur, quae per coctilidonem proprium ramulo in quo crescit, non conjungitur, sed post super ramusculos ejus nascuntur scyphuli quidam, et in illis pullulat glans ipsa. Glans autem habet extra se siliquam duram In qua continetur, quae quasi lignea est optime plana, columnalis figurae, nisi quod superius ejus non est superficies plana, sed sicut hemisphaerium habens punctum in medio quasi esset poli signum. Inferius autem est basis giandis, per quam sugit ex scyphulo suo : et illa etiam non directa est plana superficies, sed sicut hemisphaerium aliquantulum in polo compressum, quod contingit locum nutrimenti nisi in puncto : et tunc non sufficiens posset trahere nutrimentum. Glans autem quae est in siliqua, habet circa se corticem non durum sed mollem, qui nascitur ex purgamento glandis, et in ipso est involuta glans p3r medium divisa, sicut si columna secetur superficie per sui longitudinem. In supremo autem sui germen suum habet, et quod subter est de farinali substantia, depuratum est in materiam et cibum germinis. Scyphus autem in quo sedet glans ipsa, est concavus bene formatus, quasi esset tornatilis intus : cujus fundus est aliquantulum planus, in quo glans sedens suxit nutrimentum, et exterius est scabiosus, habens superficiem asperam propter terrestreitatem ipsius, quae purgata est ex materia glandis : nec per coctilidonem sive pendiculum aliquod conjungitur ramo, sed immediate sedet super ipsam : et hoc fit ne nimis distet glans a ramo : quia si per longas vias sugeret, induraretur et infrigidaretur nutrimentum glandis, et non proficeret, praecipue cum arboris hujus succus sit valde terrestris.

In foliis autem quercus invenitur frequenter nascentia quaedam rotunda sicut sphaera quae galla vocatur, quae si per tempus steterit, profert vermiculum : eo quod ex corruptione folii nascatur, qui quando bene obtinet modum gallae, pronuntiant aeremantici quod futura erit hyems asperior. Quando autem est circa extremum gallae, pronuntiant quod erit hyems levis. Similiter autem dicunt de verme qui eruca dicitur,et in telis quibusdam in ramulis quercus et aliarum ar-

borum involvit ova sua. Quando autem nidus ille erucae est frequenter in altioribus cacuminibus arborum, prognosticart

hyemem futuram esse levem et mollem : quando autem inferiora occupat quercus et aliarum arborum, dicunt futuram esse asperam et rigidam. Galla autem succum habet per se quidem purum quamdiu est viridis et humida : quando autem fricatur ad ferrum planum et mundum, statim convertitur ad naturam incaustri nigri valde : et haec est causa, quia resolvit scabrositatem ferri, et ferrugo tunc commixta cum succo inducit nigredinem : et hujus signum est, quia nisi cito abstergatur ferrum a succo ejus, statim rubigine in loco contactus succl consumitur.

Est autem glans et tota quercus naturaliter frigida et sicca, et siccitas ejus est major quam frigiditas ejus : et in hoc differt a castanea : quoniam in illa est aliquid caliditatis, quod ostendit sua dulcedo. Folia autem glandis sunt vehementis stiplicitatis et minoris exsiccationis. Convenit autem cum castanea glans, quod est utraque abstersiva et inflationem faciens in interiori alvo, et quod utraque confortat membra, et quod utraque boni nutrimenti praecipue porcis. Galenus enim dicit, quod tam glans quam castanea est boni nutrimenti et laudabilioris omnibus granis in arboribus crescentibus : sed castanea nutribilior est glande propter majorem dulcedinem. Nutrimentum tamen eorum est hominibus illaudabile, eo quod nimis est stipticum : sed si castenea cum zuccharo misceatur, fit boni nutrimenti : tardae enim aliter sumpta erit digestionis, sed glans tardioris. Stipticitas autem major est in cortice interioris glandis, quam sit in ipsa glande. Folia etiam quercus pulverizata quando projiciuntur super plagas, faciunt eas cohaerere. Tam glans autem quam castanea confert contra venena. Galla autem est frigida et humida : meliorem autem habent virtutem immaturae et ponderosae. Glandes autem molles parvae sunt virtutis : aduruntur autem super prunas, et pulvis colligitur : quia constrictio illius est vehemens, et prohibet cursum humiditatis : eo quod substantia earum est frigida terrea : aqua autem earum denigrat capillos : pulvis autem earum aufert carnem additam et verrucas. Conferunt etiam gallae positae in corrosione dentium, et alias medicorum multas conferunt operationes, quae in simplicibus medicinis habent determinari.