131. De Beata Maria V.

1 a. Vellus Gedeonis

Partum mirabilem
Praesignavit nobis
Atque laudabilem
Virginis Mariae:

1b. Ut vellus maduit
De caelesti rore,
Sic virgo parturit
Servato pudore
Dominum gloriae.

2 a. Aaron ut virgula
Profert amygdala,
Sit licet arida,
Fit tamen florida
Virtute divina,

2 b. Sic virgo beata,
Desuper adflata
Divo spiramine,
Abs viri semine
Parit vi divina.

3 a. Istud praedixerunt
Vatum oracula,
Ac praesignaverunt
Multa miracula
Priscis temporibus ;

3 b. Vates Esaias

Id palam praedixit,
Dum almam praegnantem
Parituram dixit
Salutem gentibus.

4 a. Portam Ezechiel

Clausam se vidisse
Nullique perviam
Dicit permansisse

Praeterquam principi ;

4b. Rubum, quem Moyses
Vidit incombustum,
Signabat virginis
Pariturae Christum
Hymen non corrumpi.

5 a. Humana ratio

Nequit discutere
Partum virginalem,
Sed quisque credere
Debet fideliter.

5 b. Ut vitrum solaris

Non laedit radius,
Sic virginitatem
Non tollit filius
Matri perenniter.

6 a. Virginis Mariae
Pili dulcissime,
Iesu Christe, pie
Veniam tribue
Te postulantibus,

6 b. Praesentisque vitae
Cursu consummato
Fac, ut cernamus te
In caelo stellato

Cum sanctis omnibus.