Sermo VI .

Item, sermo fratris Bonaventurae in domo Praedicatorum Parisius, coram Universitate, quando Epiphania contigit in Dominica.

Qui sedes super Cherubim, manifestare coram Ephraim, Beniamin et Manasse, Psalmus .

In verbis propositis praedicit David Propheta Christi nati manifestationem desideratam, in quibus duo insinuat, scilicet Christi, infantis dignissimi, sublimem magnitudinem secundum Divinitatem aeternam, ibi: Qui sedes super Cherubim; eiusdem apparitionem gratificam secundum humanitatem assumtam, ibi: manifestare coram Ephraim, Beniamin et Manasse, quasi diceret Propheta: qui praesides cunctis caelestibus spiritibus per excellentiam magnificentiae, supremae manifestare cunctis hominibus per illos tres, et maxime gentibus, per declarationem humanitatis assumtae.

Notandum ergo circa haec, quod Propheta David orat, ut, quemadmodum Filius Dei, Verbum Patris, excedit et superexcellit omnem creaturam, tam angelicam quam humanam, pro eo, quod ipse imperans universaliter sedet super excelsa caelorum ut inaccessibilis lux, ut invincibilis virtus , ut impretiabilis salus , ita se manifestare dignetur hominibus Verbum incarnatum secundum haec tria. Quod et fecit; nam se hodie manifestavit ut splendor lucis aeternae, ut Verbum virtutis immensae, ut salus naturae humanae.

Manifestavit enim se tali die ut lux insolita apparitione stellae fulgentis, Matthaei secundo; de qua manifestatione potest illud dici primae ad Timotheum tertio: Manifeste magnum est pietatis sacramentum, Quod manifestatum est in carne, iustificatum est inspiritu, apparuit Angelis, praedicatum est gen tibus, creditum est in mundo, assumtum est in gloria.

Ut virtus in subita transmutatione naturae elementaris; Ioannis secundo ": Hoc fecit initium signorum Iesus in Cana Galilaeae et manifestavit gloriam suam, et crediderunt in eum discipuli eius.

Ut salus in gratuita sanctificatione undae regenerant; Ioannis primo: Ut manifestetur in Israel, propterea veni ego in aqua baptizans; hoc dixit Ioannes, quando Christus ivit ab baptismum suum . Apparuit ergo Christus hodie nobis per diffusionem lucis ut veritas, per operationem virtutis ut maiestas, per sanctificationem aquae baptizantis ut benignitas

Iuxta quem triplicem modum manifestat se spiritualiter omni se disponenti per suum adventum in mentem, in quo quidem manifestatur nobis ut lux per revelationes praeclaras; Ecclesiastici sexto : Investiga sapientiam, et manifestabitur tibi.

Ut virtus per operationes mirificas; Psalmus: Firmamentum est Dominus timentibus eum, et testamentum ipsius ut manifestetur illis.

Ut salus per condescensiones benignas; ad Colossenses primo: Mysterium, quod absconditum fuit a sacculis et generationibus, nunc autem manifestatum est sanctis eius.

Sed, quia Christus Iesus non manifestat se omnibus, sed solum debito se sibi conformantibus, notandum, quod manifestat se per revelationes praeclaras solum fideliter credentibus; Baruch quarto : Beati sumus, Israel, quia quae Deo placent manifesta sunt nobis.

Per operationes mirificas solum fidenter exspe ctantibus; secundi Machabeorum ultimo: Suspendii autem Nicanoris caput in summa arce, ut evidens esset et manifestum signum auxilii Dei. Hic est Christus qui caput diaboli suspendit, auferendo ei potentiam etc.

Per condescensiones benignas solum ferventer diligentibus; Ioannis decimo quarto: Qui diligit me diligetur a Patre meo, et ego diligam eum et manifestabo ei me ipsum.

Primi, scilicet fideliter credentes, significantur per Ephraim, qui interpretatur frugifer; sinefideimpossibile est placere Deo .

Secundi, scilicet fidenter exspectantes, significantur per Beniami n, qui interpretatur filius dexterae, quia fixum habent cor, ubi est Christus, in dextera Patris.

Tertii, scilicet ferventer diligentes, significantur per Manassen, qui interpretatur oblivio, quia, obliti sui et mundi, totaliter expositi sunt in obsequium Iesu Christi. Primi offerunt aurum intelligentiae refulgentis, in quantum vere credentes; secundi, thus confidentiae sursum agentis, in quantum vere sperantes; tertii, myrrham mortificationis carnis, in quantum amore ecstatico excedentes. Secundum quae omnia adoratus fuit hodie a tribus Magis, et oblata fuit sibi triplex differentia muneris.

Secundum etiam hunc triplicem modum manifestabit se in die iudicii, scilicet ut lux generaliter universis, et quantum ad personas et quantum ad conscientias; secundae ad Corinthios quinto : Omnes nos manifestari oportet ante tribunal Christi etc.

Ut virtus terribiliter malis, et quantum ad iram et quantum ad vindictam; Psalmus: Deus manifeste veniet etc.

Ut salus desiderabiliter viris iustis, et quantum ad benevolentiam et quantum ad gloriam; Ecclesiastici decimo septimo: Et pars Dei Israel facta est manifesta .