126. De Corpore Christi.

1. Panis vivus typicatus

Reclusus velaminibus,
Sciscitatur designatus

Lugubraminibus,
Nunc in mundum translegatus

Fit cibus viatoribus
Et in cruce est oblatus

Pro foedis peccatoribus.

2. Iste panis, est credenti

Qui salutis hostia,
Fideliter se vescenti

Caeli pandit ostia.
Pange, exsul, typicalem

Recolendo victimam
Sancti agni, quae paschalem

Se dedit dapem optimam.

3. In figuris praesignatus

Obscuri aenigmatibus,
Iste est agnus nobis datus

In pabulum credentibus.
Iste [panis] spiritalis,

Salubriter reficiens,
Vita bonis, mors est malis,

In se non deficiens.

4. Panis, ecce, angelorum,

Non mittendus canibus,
Est factus cibus viatorum

Repromissus patribus.
Iste panis sacramentum

Novum et celeberiimum,
Quod antiquum testamentum

Terminat durissimum.

5. Tantum ergo sacramentum

Teneremur cernui
Et antiquum testamentum

Novo cedat ritui,
Praestet fides supplementum

Sensuum defectui,
Fides sitque firmamentum

Aegro intellectui.